Жоспарға сай жүзеге асқан жұмыс

Жаңа оқу жылында  бірінші сыныпқа 6 400-дей жеткіншек барады. Соның 3 мыңға жуығы Қызылжардың өзінде болса, ал қалғаны –  облыс аумағындағы елді мекендерде. Сонымен қатар 279 ауылдағы үш мыңнан аса оқу­шыны 150 автобус тасымалдап, мектепке жеткізеді.

Облыстық білім басқарма­сының басшысы Айнагүл Сұраға­но­­ваның айтуына қарағанда,  мектеп жасындағы бірде-бір бала оқудан тыс қалмайды.  Облыста табысы төмен отбасыларда 8 мыңнан артық оқушы бар, оларды қамтамасыз етуге бюджеттен 1,5 млрд теңге қарастырылған. Бұл бюд­жеттен жалпы білім беретін мек­теп­терді ұстауға бөлінген биыл­ғы қаржы­ның 1,5 пайызы. Аз қам­тылған отбасыларға «Мектепке жол» акциясы аясында  тамыздың басынан бастап 46 228 теңге­ден бір рет­тік көмек жасалған. Бүгінге дейін 4 мыңнан аса оқушының ата-анасы оны алып үлгерді.

Облыс көлеміндегі 24 колледж­де 11 мыңға жуық жасөспірім оқиды. Биыл бірінші курс табал­ды­ры­ғын 4 мыңға жуық түлек аттайды. Олардың 50 пайызға жуығы жұмысшы мамандығын таңдаған.             

Мектептерді жаңа оқу жылына дайындау жұмыстары белгі­лен­ген жоспарға сәйкес іске асы­рылды. Мәселен, Шал ақын ауданындағы Жалтыр мектебі, Преснов ауылындағы интернат, Аққайың ауданындағы аграрлық колледж күрделі жөн­деуден өткізілді. «Келешек мектеп­тері» ұлттық жобасы аясында салынып  жатқан Петропавлдың «Береке» шағын ауданындағы 600 орындық мектеп құ­рылысы 1 қыркүйекте аяқталып, жаңа оқу жылына есігін айқара ашпақ. Қазірдің өзінде онда оқуға 500-ден артық өтініш түссе, соның 116-сы ғана қазақ тілінде оқуды қалаған. Бұл мемлекеттік тілді үйренуге, оқуға деген құлшынысты тудыруға еліміздегі білім беру қызметінің көңіл аударуы кемшін екенін көр­се­теді.

Облыстық білім саласындағы сапаны қамтамасыз ету депар­таментінің басшысы Гүлнәр Таласбаеваның айтуына қара­ған­да, мектептердің жұмысы мен материалдық сапасына мониторинг үзбей жасалады. Биылғы оқу жылында облыстың білім саласында 16 128 педагог – қызмет етеді. Соның 11,6 мыңы мектеп мұғалімдері. Жаңа оқу жылында 985 маман жетіспейді, оның 675-і ауыл мектептерінде. Облыстағы 444 мектептің 44-інде басшы жоқ.

Г.Таласбаеваның сөзінше,  об­лыс­тағы жаңғырту бағдар­ла­­масына 83 мектеп енгізілген, департамент соның 42-сіне мониторинг жасаған. Мектептер басқа жиһаздардан гөрі білім ошағының асханасына жарақтар алуда белсенділікпен көзге түскен. 42 мектептің 38-інде қауіпсіздік шараларын жолға қою дұрыс сапаға жеткізілген. Өкінішке қарай, әлі күнге дейін 27 мектеп аттестациялаудан өтпеген. 

Облыстағы М.Қозыбаев атын­­дағы Солтүстік Қазақстан уни­верситетінде биылғы оқу жылын­да 5 835 студент оқиды. Оның негізгі бөлігі, яғни 5 354 бакалавр, 286 магистрант, 14 докто­рант. Былтыр жоғары оқу орнын аяқ­­таған түлектердің 84 пайызы жұмысқа орналасқан. Биыл «Сер­пін» бағдарламасымен 65 тү­лек университетті тәмамдаса, со­ның 63-і жұмысқа қабыл­дан­ған. 

Жаңа оқу жылында көше мен мектеп қауіпсіздігіне ерекше мән беріліп отыр. Осыған орай облыстық ПД өздерінің жұмысын бірнеше бағытқа бөлген. Мектеп маңындағы жол қауіпсіздігі – соның алғашқы бағы­ты. Әкімшілік полиция­сы бұл бағыт бойынша жол белгі­ле­рінің, айрықтарының анық және бала­лар­ға көрнекі болуын қада­ға­лайды.

Сондай-ақ 31 тамыздан бас­тап, 9 қыр­күйекке дейін «Абай болыңыз­дар, балалар!» атты акция жүргізіледі.

Солтүстік Қазақстан облысы