Іс-шараға қала әкімдігі өкілдері, қалалық мәслихат депутаттары, жоғары оқу орындарының ректорлары мен грант иегерлері қатысты. Грант табыстау жыл сайынғы дәстүрге айналып, елордалық жастарға сапалы білімге қол жеткізуге жол ашып келеді. Биылғы іс-шара аясында бірқатар жоғары оқу орындары мен колледждер өз гранттарын ұсынған. Атап айтқанда, Тұран-Астана университеті – 8 грант, Сәкен Сейфуллин атындағы Қазақ агротехникалық зерттеу университеті – 1 грант, «Синергия» университеті – 4 грант, Астана халықаралық университеті – 3 грант, Мағжан Жұмабай атындағы жоғары колледж 5 грант бөлген.
Салтанатты жиын барысында сөз алған Астана қалалық мәслихаты төрағасы Табиғат Зейнұлқабденұлы елорда жастарының әлеуетін арттырудың маңыздылығын атап өтті. Ол білім гранттарының тек материалдық қолдау емес, сонымен қатар жастардың өмірлік мақсатына жетуге берілген сенім мен мүмкіндік екенін жеткізді.
«Бүгін біз дәстүрге айналған маңызды істі жалғастырып отырмыз. Биыл түрлі университеттер тарапынан 21 грант ұсынылып отыр. Оған жеке жоғары оқу орындары мен меценаттар үлкен қолдау білдірді. Әсіресе әлеуметтік тұрғыдан осал санаттағы жастарға, көпбалалы отбасылардың балаларына және қала өміріне белсенді араласқан еріктілерге басымдық берілді. Бұл дәстүр кейінгі төрт-бес жыл көлемінде тұрақты түрде жалғасып келеді. Биылғы гранттарға Астана халықаралық университеті, Сәкен Сейфуллин атындағы Қазақ агротехникалық зерттеу университеті, Мағжан Жұмабай атындағы жоғары колледж бен «Синергия» жекеменшік жоғары оқу орны атсалысты. Грант иегерлері өздері қалаған мамандық бойынша білім ала алады. Дегенмен бүгінде техникалық және жұмысшы мамандықтарына сұраныс жоғары. Сондықтан жастардың осы бағыттарды таңдап, ел дамуына қажетті инженерлер мен кәсіби мамандар болып шығатынына сенім артамыз. Біздің басты тілегіміз – жастардың білімге құштар болып, берілген мүмкіндікті толық пайдаланып, елге пайдасын тигізуі. Бұл – олардың арманын жүзеге асыруға берілген мүмкіндік. Біз жастарға сенеміз», деді ол.
Астанада өткен білім гранттарын табыстау рәсімінде Астана халықаралық университетінің вице-президенті Қайрат Абдрахманов оқу орнының жетістіктері мен стратегиялық бағыттары туралы айтты.
«Біз небәрі жеті жыл бұрын құрылған жас университет болсақ та, бүгінде елорданың ең ірі педагогикалық кадрлар даярлайтын оқу орындарының біріне айналдық. Биыл мыңға жуық бакалавр түлектерін ұшырып, олардың басым бөлігі елорданың мектептерінде еңбек жолын бастады. Университетіміздің даму қарқыны Астананың жалпы дамуымен тікелей байланысты. Халықаралық бағытқа басымдық беріп отырмыз. Шетелдік университеттердің филиалдары ашылды, Орта Азиядан талантты жастарды магистратураға тарту үшін гранттар бөлуді бастадық. Бұл – елімізді өңірдегі жоғары білім орталығына айналдыруға бағытталған нақты қадам. Сонымен қатар біз Мемлекет басшысы Қасым-Жомарт Тоқаевтың аймақтық деңгейде жоғары білімді дамыту жөніндегі тапсырмаларын жүзеге асырып келеміз. Біздің мақсатымыз – елордамен бірге дамып, жастарға сапалы білім беріп қана қоймай, олардың халықаралық деңгейде білім алуына жол ашу», деді Қ.Абдрахманов.
Грант иегерлері талпынысының арқасында биік мақсаттарға ұмтылып жүрген жастар. Олардың арасында қоғамдық істерде белсенді еріктілер де бар. Жастардың ортақ арманы – сапалы білім алып, ел дамуына қызмет ету.
Сәкен Сейфуллин атындағы Қазақ агротехникалық зерттеу университетінің грантын иеленген Балауса Мадиярқызы қуанышын жасырмады. «Бұл грант – мен үшін үлкен мүмкіндік әрі жаңа өмірге бастар жол. Арманым – жақсы маман болып, елімнің дамуына үлес қосу. Бүгін қолыма тиген сертификат тек құжат қана емес, менің болашағыма ашылған есік деп білемін. Бізге сенім артқан жандардың үмітін ақтауға тырысамыз», деді ол.
Салтанатты рәсім соңында грант иегерлеріне сертификаттар табысталып, олардың ата-аналары мен ұстаздарына да алғыс айтылды. Жас буынның қуанышты сәтін бөліскен қауым жаңа оқу жылы қарсаңында елордада осындай игі іс-шараның өткізілуін жастарға жасалған үлкен қолдау ретінде бағалады.
