Фото: Oqu-agartu ministrligi
Қаланың халық ең тығыз қоныстанған аудандарының бірі «Арай» шағын ауданында 1500 орындық жаңа мектеп есігін айқара ашты. Бұл – Қызылордадағы ең ірі білім ошағы. Ол сыныптардағы артық жүктемені азайтып, балаларға жайлы ортада білім алуға мүмкіндік береді. Сондай-ақ «Қызылжарма» шағын ауданында 900 орындық жаңа мектеп пайдалануға берілді. Ол ескі ғимараттың орнына салынған әрі заманауи стандарттарға сай келеді.
Облыс әкімі атап өткендей, Қызылорда үш ауысымды оқыту мәселесін түбегейлі шешкен көшбасшы аймақтардың қатарына енді. Бұған дейін мұндай нәтижеге Шымкент қаласы мен Ақмола облысы қол жеткізген болатын.
Сала министрлігінің баспасөз қызметінің мәлімдеуінше өңір тұрғындары алдында сөз сөйлеген Оқу-ағарту министрі соңғы екі жылда жүйелі жаңғырту мен мектеп инфрақұрылымын кеңейту нәтижесінде елімізде үш ауысымды мектептердің саны үш есеге қысқарғанын ерекше атап өтті.
«Екі жылдың ішінде Қазақстандағы үш ауысымды мектептердің саны үш есе азайды. Бүгінде шамамен 3 мың мектеп бір ауысымда, 5 мыңға жуық мектеп екі ауысымда жұмыс істейді. Мұндай нәтижеге мемлекет тарапынан жаңа мектептер құрылысы мен инфрақұрылымды жаңғыртуға бағытталған ауқымды шаралардың арқасында қол жеткізіліп отыр. 2025-2026 оқу жылдары 267 мың орынға арналған 232 жаңа мектептің құрылысы жоспарланған. Сонымен бірге мектептерді жаңғырту бойынша реновациядан өткізу бағдарламасы жүзеге асырылып жатыр. Биыл бұл бағдарлама 190 мың оқушы білім алатын 245 мектепті қамтиды», деді Ғани Бейсембаев.
Бүгінде Қызылорда облысында 8 жайлы мектеп бар. Оның екеуі осы аптада ашылса, тағы екеуі жаңа оқу жылы басталғанға дейін оқушыларды қабылдауға дайын болмақ.
