Ұлттық статистика бюросының дерегіне сүйенсек, қазір елімізде 74 театр жұмыс істейді. Олардың басым бөлігі – 79,7%-ы мемлекет меншігінде. Театр алаңдарының саны бойынша Алматы көш бастап тұр: қалада 22 театр бар. Астанада – 10, Шымкентте – 6 театр көрермендерге қызмет көрсетеді.
Еліміздегі театрлардың негізгі бөлігі – драма сахналары. Қазір елімізде 40 драма театры жұмыс істейді. Бұдан бөлек, 11 қуыршақ театры, 4 музыкалық, 4 опера және балет театры, сондай-ақ өзге жанрдағы сахна алаңдары көрерменге өнер ұсынып келеді. Бұл театр өнерінің жан-жақты дамып жатқанын көрсетеді.
2024 жылы елімізде театр қойылымдарын тамашалаған көрермендер саны 3 миллион адамға жеткен. Бұл – 2023 жылмен салыстырғанда 3%-ға көп. Бір жыл ішінде сахнада 2 553 қойылым қойылып, олардың саны бір жыл бұрынғыдан 14%-ға артқан.
Алдағы маусымда театр сахналарында жаңа премьералар көп болады деп жоспарланып отыр. Драма театрлары классикалық қойылымдармен қатар заманауи пьесаларды сахналауға ден қойса, опера және балет театрлары халықаралық деңгейдегі спектакльдер әзірлеуде. Қуыршақ театрлары болса, балалар мен жасөспірімдерге арналған жаңа қойылымдарын ұсынбақ.
