Президент Қасым-Жомарт Тоқаев Ауыл шаруашылығы еңбеккерлерінің І форумында «Маңызды міндеттің бірі – ауыл халқының табысын арттыру. «Ауыл аманаты» бағдарламасы арқылы жылдық өсімі 2,5 пайыз болатын шағын несие беріле бастады. Соның нәтижесінде ауылда 16 мыңға жуық жаңа жұмыс орны ашылды. Осындай ауқымды жұмыс жалғасын табады. Себебі ауылды көркейту – стратегиялық міндет», деген еді. Мемлекет басшысының пәрменінен соң, ауыл жұрты да жеңілдетілген несиеге қол жеткізіп, кәсіптерін дөңгелетіп отыр. Осылайша, ауыл шаруашылығын дамытуға ең қолайлы аймақтардың қатарындағы облысымызда «Ауыл аманаты» бағдарламасы сәтті жүзеге асып жатыр.
Бағдарлама былтыр да қарқынды жүзеге асты. Бағдарламаға 2,5 млрд теңге бөлінген. Ауыл шаруашылығы басқармасының бөлім басшысы Қуандық Ахметов бөлінген қаражат толығымен игерілгенін айтады.
«Басқарма тарапынан «жұмыс істеймін, табыс табамын» деген әр ауыл тұрғынына қолдау көрсетіледі. Былтыр 249 шағын несие беріліп, 52 жоба қаржыландырылды. Нақты айтсақ, 1,2 млрд теңге ауыл шаруашылығы кооперативтеріне берілді. Сонымен қатар жеке қосалқы шаруашылықтарға қолдау көрсетілді. Бұл – 1,3 млрд теңгені құрайтын 197 жоба. Нәтижесінде, ауылды жерлерде 314 жұмыс орны құрылды. Бүгінгі таңда қаржыландырылған жобалар оң нәтижесін көрсетіп жатыр. Бұл бағыттағы жұмыстар әрі қарай да жалғасын таба береді», дейді Қуандық Ахметов.
Шағын несиелер бірнеше бағытта берілген. Мысалы, мал шаруашылығындағы 150 жобаға 1,25 млрд теңге бөлініпті. Ал өсімдік шаруашылығына 54 млн теңге үлестірілген. Мұндай бағыттағы 4 бірдей ауқымды жоба жүзеге асқан. Ауыл шаруашылығы саласында арнайы техникалардың да атқарар рөлі үлкен. Техника мен тіркемелі жабдықтарды сатып алуға 767 млн теңге берілген. Қаражат 45 жобаға жұмсалған. Ауыл шаруашылығы өнімдерін қайта өңдеуде басқармаға 7 жоба келіп түскен. Аталған жобаларға 123 млн теңге бөлінген. Сонымен қоса, ауылдан кәсіп ашамын дегендер де қаржылай қолдау тауып отыр. Мәселен, дүкен мен дөңгелек жөндеу орталығы секілді басқа да бизнес нысандар жатады. Бұған 43 жоба ұсынылған. 43 жобаға 337 млн теңге қаржыландырылған.
Биыл да жоба жүйелі жүзеге асып жатыр. Осы жылға «Ауыл аманаты» бағдарламасы аясында шағын несие беру үшін 2 млрд теңге бөлу жоспарланыпты. Яғни 296 жобаға берілетін шағын несие. Межеленген жоспар ойдағыдай орындалса, онда ауылдық жерлерде 322 жұмыс орны ашылады. Биыл 148 несие мал шаруашылығына, өсімдік шаруашылығындағы 26 жобаға, ауыл шаруашылығы өнімдерін қайта өңдеу және ауыл шаруашылығына жатпайтын кәсіптегі 122 жобаға қаражат беріледі.
«Ауыл аманаты» бағдарламасы арқылы Бұқар жырау ауданы Белағаш ауылынан Ерболат Молдабеков шина жөндеу шеберханасы ашқан.
«Жас кезімде қаладағы дөңгелек жөндеу орталығында жұмыс істеп, тәжірибе жинадым. Өз кәсібімді ашу көптен бергі арманым еді. Бірақ қаражат жағы қолбайлау болды. Бағдарлама туралы ести сала, құжат жинап, өтінім бердім. Барлық рәсім оңай әрі жылдам өтті. Ауыл әкімдігі де көп көмек көрсетті», дейді Ерболат.
Кәсіпкер 2,8 млн теңге көлемінде жеңілдетілген несие алып, шеберханаға қажет құрал-жабдық сатып алған. Несие 5 жыл мерзімге 2,5 пайыздық мөлшерлемемен берілген. Кәсіп иесі қаражатын дөңгелек шешу және балансировка станоктары, компрессор, көтергіш пен қосалқы бөлшектерге жұмсаған.
Келешекте кәсіп иесі шеберханасын кеңейтіп, жаңа қызмет түрлерін – қозғалтқыш пен беріліс қорабын жөндеу, сырлау, дәнекерлеу жұмыстарын да қолға алуды жоспарлап отыр. Айтпақшы, бұл – кәсіп Белағаш ауылындағы «Ауыл аманаты» бағдарламасы арқылы сәтті жүзеге асқан үшінші жоба.
«Ауылымыз бойынша жеті өтінім қабылданды. Екеуі мал шаруашылығына бағытталған. Ал Ерболаттың жобасы – ауыл тұрғындарының кәсіпкерлікке бейім екенін көрсететін жарқын мысал. Біз мұндай бастамаларды қолдауға әрдайым дайынбыз», дейді ауыл әкімі Амангелді Күпенов.
Қазірдің өзінде Ерболаттың қызметіне көрші ауылдардан да сұраныс бар көрінеді. Бұл ауылдағы қарапайым кәсіптің де табыс көзі бола алатынын дәлелдеп отыр.
Бағдарламаның шапағатын көргендердің қатарында бұқаржыраулық Надежда Елікбаева да бар. Ол былтыр өз кәсібінің жобасын ұсынып, бағдарлама аясында 2,5 пайызбен 4 млн теңге несие алған. Қаражатқа жылыжай салған. Жылыжайында жеміс-жидек жайқалып өсіп, аудан халқын табиғи өніммен қамтамасыз етіп отыр.
«Жылыжайды кәсіби мамандары бар компания салып берді. Сапасына көңілім толады. Мәселен, былтыр екі рет өнім алдым. Қияр 2,5, ал қызанақ 2 тоннаға дейін жетті. Жылуды жақсы сақтайды. Аумағы 200 шаршы метр. Жылыжайда қара күзде қызанақ, ал көктемде қияр өсіруге болады. Өнімдерімді көрші ауылдың тұрғындарына да сатамын. Тұрақты сатып алушыларым да бар. Жалпы, жылыжай кәсібімен айналысып жүргеніме 10 жылға жуықтады. Сол себепті де, өнімді саудалаудан қиындық көрмеймін. Қызанақ пен қиярда ешқандай химия жоқ. Бәрі табиғи әдіспен өсірілген. «Ауыл аманаты» бағдарламасы ауыл тұрғындары үшін өте қолайлы. Өйткені ауылда екі қолға бір күрек табыла бермейді. Тек ынта мен ерік-жігер қажет», дейді Надежда Елікбаева.
Нұра ауданы Шұбаркөл ауылының тұрғыны Әділбек Әбуов «Ауыл аманаты» бағдарламасы арқылы несие алып, қымыз өндіру кешенін ашты. Ол қаражатына 42 бас жылқы, сонымен қатар қажетті жабдықтар сатып алды.
Ал Абай қаласынан жаңа наубайхана ашылды. Кәсіпкер Вадим Аничкин бөлінген қаржыға наубайханаға қажетті жабдықтар – пештер, мұздатқыштар сатып алған. Қазір бұл наубайханада күніне 1000 дана бөлке нан піседі. Төрт адам тұрақты жұмыс істейді.
Мемлекет басшысы Ауыл шаруашылығы еңбеккерлерінің бірінші форумында «Халқымыздың 40 пайызы ауылда тұратынын білесіздер. Агроөнеркәсіп кешені бүкіл елдің, әсіресе ауыл тұрғындарының тұрмыс сапасына тікелей әсер етеді. Сол себепті мен ауылды өркендету ісіне айрықша мән беремін», деген еді. Расында, «Ауыл аманаты» жобасы ауыл халқының кәсіппен де айналысуына мүмкіндік тудырып, серпін беріп келеді.
Қарағанды облысы
