М.Әшімбаев кездесуде мәртебелі мейманға ілтипат білдіріп, Тәжікстан еліміздің маңызды стратегиялық серіктесі және сенімді одақтасы екенін айтты. Сондай-ақ екі мемлекеттің басшылары арасындағы өзара сенімге негізделген қарым-қатынастың және олардың күш-жігері мен бірлескен жұмысының арқасында барлық деңгейде тығыз саяси байланыс орнағанын атап өтті. Сұхбат кезінде өзара экономикалық іс-қимыл белсенді дамып, мәдени-гуманитарлық байланыстар да нығая түскені сөз болды.
«Жоғары деңгейдегі тұрақты кездесулердің және мемлекет басшыларының өзара сапарларының нәтижесінде ауқымды мәселелер бойынша маңызды келісімдерге қол жеткізілді. Тәжікстан Президенті Эмомали Рахмон 2023 жылы Қазақстанға мемлекеттік сапармен келді. Сапар барысында Одақтастық өзара іс-қимыл туралы декларацияға қол қойылды. Былтыр Қазақстан Президенті Қасым-Жомарт Тоқаевтың Тәжікстанға мемлекеттік сапары аясында Одақтастық қатынастар туралы шартқа қол қойылды. Екі құжат та бауырлас халықтарымыздың ұлттық мүдделеріне сай келеді және елдеріміздің өзара іс-қимылын жан-жақты тереңдетуге айтарлықтай серпін берді. Осы орайда біздің басты міндетіміз – мемлекет басшыларының деңгейінде қол жеткізілген барлық уағдаластықты тиімді іске асыруға ықпал ету», деді М.Әшімбаев.
Сонымен қатар тараптар екі ел президенттері белгілеп берген ынтымақтастықтың жоғары деңгейін парламенттер арқылы да қолдаудың маңызды екеніне назар аударды. Бұл ретте Екіжақты өзара іс-қимылдың жол картасы ерекше мәнге ие. Ол өңіраралық өзара іс-қимылды дамытумен бірге өзге де ауқымды мәселелерді қамтиды. Құжатқа Душанбеде өткен тұрақты комиссияның отырысында қол қойылғанын атап өткен жөн. Бүгінгі кездесуде Жол картасында көрсетілген міндеттерді іске асыру аясындағы бірлескен жұмыс туралы да сөз болды.
«Қазіргі таңда елдеріміздің парламенттері арасындағы байланыстар тұрақты және жүйелі сипатқа ие. Екіжақты өзара іс-қимылдың жол картасын қабылдау Парламент палаталарының бірлескен іс-қимылы бағытындағы маңызды қадам болды. Бүгінде Палаталарымыз арасында Ынтымақтастық жөніндегі комиссия, сондай-ақ өңірлік парламентаралық ынтымақтастықтың маңызды негізін қалаған Орталық Азия мемлекеттерінің Парламентаралық форумы белсенді жұмыс істеп келеді. Мұндай форумдарды өткізу аймақ елдерінің мүдделеріне сай келеді және Орталық Азияның саяси, экономикалық, мәдени әлеуетін тиімді іске асыруға ықпал етеді», деді М.Әшімбаев.
Кездесуде екіжақты және көпжақты ынтымақтастықтың барлық бағыты бойынша сындарлы диалог орнатудың маңызы да әңгімеге арқау болды. Экологиялық сын-қатерлерді еңсеру жолында күш-жігерді ортақ мүддеге жұмылдыру мәселесіне баса мән берілді. Бұл ретте су қатынастары саласындағы түйткілдерді шешу кезіндегі өзара іс-қимылдың нақты шаралары, Халықаралық Аралды құтқару қоры аясындағы бірлескен жұмыс, оның ішінде су-энергетикалық ынтымақтастықтың тиімді тетігін әзірлеу жұмыстарына үлкен көңіл бөлінді.
Өз кезегінде Р.Эмомали парламентаралық және өңірлік деңгейлерде қазақ-тәжік ынтымақтастығы тұрақты дамып келе жатқанын атап өтті. Ол біздің еліміздің әлемде рухани дипломатияны дамытуды көздейтін бастамалары мен сол бағыттағы батыл қадамдарын жоғары бағалады. Сондай-ақ барлық маңызды сала бойынша өзара ынтымақтастықты нығайтуға мүдделі екенін айтты.
Бұдан басқа, тараптар өңірдің орнықты дамуына, мәдени-гуманитарлық байланыстарды кеңейтуге, Әлемдік және дәстүрлі діндер көшбасшыларының алдағы съезі аясында рухани дипломатияны ілгерілетуге қатысты мәселелер жөнінде пікір алмасты. М.Әшімбаев Тәжікстанның съезді жан-жақты қолдап, Тәжікстан ғұламалар кеңесінің аталған іс-шараға белсенді қатысып келе жатқанын тілге тиек етіп, диалог, бейбітшілік және келісім мәдениетін ілгерілету ісіндегі ынтымақтастық үшін тәжік тарапына алғыс білдірді.
