Жаз күндері мұнда салқын болады. Сондықтан оңтүстіктің шіліңгір шілдесінде қала тұрғындары тауға ағылады. Қыстыңгүні тау бөктерінде қарға аунап, сырғанақ теуіп қайтатындар да аз емес. Сондай-ақ облыс бойынша ең көп демалыс орындары – осы Төлеби ауданында. Биылдың 5 айында ауданға 23 мыңға жуық демалушы келіпті. Туризм саласында қызмет көрсететін Ақмешіт, Біркөлік шатқалдарында, Сайрам-Өгем, Қасқасу, Көксәйек, Төңкеріс елді мекендерінде орналасқан 300-ге жуық демалыс аймағы бар. Аталған демалыс орындарына келушілер, шетелдік туристер аудан орталығы арқылы өтеді немесе қалаға келіп түрлі қызметті пайдаланады. Бұл орайда Леңгір қаласы аумағында құқықтық тәртіпті сақтау және қоғамдық қауіпсіздікті арттыру мақсатында бейнебақылау жүйесі кеңейтілген.
«Бүгінде аудан орталығы Леңгір қаласында жалпы 44 бейнекамера жұмыс істейді, жыл соңына дейін 18 бейнекамера орнату жоспарланып отыр. Бұл жүйе қылмыстың алдын алуға, құқық бұзушылықты жедел анықтауға және тәртіп сақшыларының жұмысын жеңілдетуге айтарлықтай үлес қосып отыр. Сонымен қатар тұрақты түрде құқық қорғау органдарының қатысуымен рейдтік іс-шаралар жиі өткізіліп, түнгі уақытта жастар мен жасөспірімдер арасында заңсыз әрекеттердің жолы кесіліп жатыр. Мемлекет басшысы «Әрбір азамат өз елінде қауіпсіз өмір сүруге тиіс. Бұл үшін құқық қорғау органдары тиімді жұмыс істеуі керек» деген болатын. Осыған орай, Ленгір қаласының учаскелік инспекторлары әкімдік қызметкерлерімен бірге тұрғындармен тығыз байланыс орнатқан. «Полиция – халықпен бірге» қағидаты негізінде учаскелік пункттер мен мектеп инспекторлары күшейтілген түрде жұмыс істейді. Оған қоса интернет алаяқтарының әрекетін алдын алу мақсатында тұрғындарға тұрақты түрде түсіндіру жұмыстары жүргізіліп, түрғын үйлерге хабарлама таратылып тұрады», дейді Леңгір қаласының әкімі Мақсат Жұмабаев.
Қауіпсіз әрі жайлы қала қалыптастыру мақсатында қала ішіндегі жол-көлік қауіпсіздігін арттыру үшін ауқымды жұмыстар да жүргізіліп жатыр. Өткен жылы жалпы қала аумағында 16 көшеге, биыл 21 көшеге асфальт салынған. Жыл соңына дейін тағы 5 көшеге асфальт төселмек. Сонымен қатар жаяу жүргіншілер қауіпсіздігін қамтамасыз ету үшін биыл 6,5 шақырым 3 көшеге аяқжол салу жұмыстары жүргізілді. Қала әкімінің айтуынша, тұрғындардың қауіпсіздігі үшін жарықтандыру жұмыстары да тұрақты атқарылып жатыр. Жалпы, былтыр 17 көше жарықтандырылса, биыл жыл соңына дейін 14 көшеге түнгі жарық шамдары орнатылады. Жол инфрақұрылымын жетілдіру аясында 66,2 шақырым жолға жол сызықтары сызылып, 990 шаршы метр жаяу жүргіншілер өткелі боялған. Сонымен қатар 143 жол белгісі жаңартылып, 18 көшеге жол кедергілері орнатылды.
«Бұл шаралар қала көшелерінде қозғалыс қауіпсіздігін айтарлықтай жақсартты. Яғни қала көшелерінде қауіпсіз қозғалыс қамтамасыз етіліп қана қоймай, тұрғындардың өмір сүруіне жайлы жағдай жасалды. Жаңартылған жолдар мен аяқжолдар, түнгі жарық шамдары апаттың алдын алып, тәртіп пен тыныштықты нығайтады. Сондай-ақ қала аумағында тұрғындардың жайлы демалысы үшін 3 саябақ, 9 сквер, 6 аллея, 16 гүлзар орналасқан. Барлық нысан заманауи жабдықтармен қамтылып, түнгі жарық шамдарымен жарықтандырылған және бейнебақылау камераларымен қамтамасыз етілген», дейді М.Жұмабаев.
Жол қауіпсіздігін қамтамасыз ету мақсатында ауданда 25 орынға «Сергек» камерасы, 60 бейнебақылау жүйесі орнатылмақ. Мектеп маңындағы жол кедергілері жаңартылып, қосымша 137 жерге орнату – жоспарда. Ауданның Зағамбар, Алғабас, Тағайна ауылдары ішімдік сатудан толық бас тартқан. Мұндай бастама тұрмыстық қылмыс пен жанжалдың азаюына, жастардың спорт пен білімге бет бұруына, ауылдың мәдени ахуалының жақсаруына ықпал етеді. Мәселен, Алғабас, Тағайна ауылдарында кейінгі 3 жылда мүлдем қылмыс тіркелмеген. Ал ішімдіксіз өмір салтын қолға алған соң үш ауылда да әкімшілік құқықбұзушылықтар да едәуір азайған. Жоғарыда айтып өткеніміздей, таулы өңірдің табиғатына қазығушы шетелдіктер көп. Төлеби аудандық полиция бөлімінің бастығы Ғалымжан Қуашбаевтың айтуынша, көші-қон қызметі құқықтық бейімделуін жеңілдету мақсатында 1200-ден аса шетелдікке QR-коды бар SIM-карталарды тегін таратыпты. Бұл бастама шетелдіктердің қауіпсіздігін арттыруға және көші-қон саласындағы құқық бұзушылықтардың алдын алуға ықпал етеді. Аталған SIM-карталар арқылы шетелдіктер арнайы мобильді қосымшаны пайдалана отырып, көші-қон қызметімен тікелей байланыс орната алады. Қосымшада ел аумағында жүріп-тұру тәртібі, уақытша тіркеу, заңды тұру және көрсетілетін мемлекеттік қызметтер туралы толық ақпарат ұсынылған.
– Президент Қасым-Жомарт Тоқаев құқық қорғау органдарының кеңейтілген алқа мәжілісінде: «Қауіпсіз қала» ұлттық платформасын іске қосу керек. Бұл – қаладағы бейнебақылау құралдары енді адамның бет-жүзін анықтап, оның жүріс-тұрысына талдау жасап, көшедегі көлікті де есепке алады деген сөз. Мұндай озық технологиялар түрлі заңсыздықтың алдын алуға мүмкіндік береді, сол арқылы қоғамдық тәртіпті нығайта түседі», деп атап өтті. Қауіпсіздік бағытындағы тапсырмаларды орындау мақсатында ауданда алдағы жылдарға нақты жоспарлар бекітілген. Жаһандық ақпараттық кеңістік дамыған сайын интернет алаяқтық та көбейіп барады. Қауіпсіздік мәселесінің ең өзекті бағыттарының бірі – киберқылмыс. Әсіресе интернет-алаяқтық қылмысы күннен-күнге күрделеніп, жаңа тәсілдермен жасалады. Осыған орай, Төлеби аудандық полиция бөлімінің ұйымдастыруымен «Интернет-алаяқтық: сақтан, сенбе, қорған!» атты ауқымды ақпараттық форум өткізілді. Іс-шараға киберқылмысқа қарсы күрес саласының өкілдері, ІТ мамандар және банк секторының қаржылық қауіпсіздік бойынша жауапты қызметкерлері қатысып, тұрғындарға алаяқтықтың алдын алу жолдары, жиі кездесетін тәсілдер мен қорғану амалдарын түсіндірді. Бұл бағыттағы алдын алу жұмыстары тек форуммен шектелмейді. Жедел уәкілдер мен учаскелік полиция инспекторлары халық көп жиналатын орындарда, сауда нүктелерінде, мемлекеттік мекемелерде, тіпті жеке үйлерді аралау арқылы да түсіндіру шараларын үзбей жүргізеді. Жыл басынан бері 4 700-ден аса тұрғынға интернет-алаяқтыққа қарсы үнпарақшалар таратылды», дейді аудандық полиция бөлімінің бастығы Ғ.Қуашбаев.
Ашық әкімдік қағидатын ұстанған Ленгір қаласы аумағында атқарылып жатқан барлық жұмыс әкімдіктің әлеуметтік желілердегі ресми парақшаларында жарияланып, тұрғындардың пікірлері мен ұсыныстары әрқашан ескеріліп отырады. «Қауіпсіз әрі жайлы қала» – бұл жай ғана ұран емес, Мемлекет басшысының тапсырмаларына сәйкес іске асырылып жатқан нақты жұмыс. Леңгір қаласы – заң мен тәртіпке негізделген, тұрғындарының жайлы әрі қауіпсіз өмір сүруіне жағдай жасалған өңірлердің қатарында. Алдағы уақытта да бұл бағыттағы жұмыстар жалғасады, өйткені қауіпсіздік – тұрақты дамудың кепілі, ал заң мен тәртіп – сол жолдағы темірқазық», дейді қала әкімі М.Жұмабаев.
Ашықтық пен қоғамдық бақылау – қала әкімдігінің ұстанымы. Қоғамдық кеңестерде және тұрғындармен кездесу барысында халықтың ұсыныстарын тыңдап, оларды қандай да бір шешім қабылдау кезінде ескеріліп отырады. Сондай-ақ қала әкімі аудан басшыларымен, полиция бөлімі басшылығымен, қала депутаттарымен, зиялы қауым өкілдерімен қоян-қолтық жұмыс жүргізіле отырып, Леңгірді қауіпсіз әрі жайлы қалаға айналдыру бағытында жүйелі шаралар атқарылып жатқанын айтады. «Цифрлық Қазақстан» бағдарламасы аясында мемлекеттік қызметтерді электрондық форматқа көшіру – жемқорлық тәуекелдерінің алдын алудағы маңызды шараның бірі. Электронды формат тұрғындар үшін ыңғайлы және әкімдікпен тұрақты кері байланыста болады.
Түркістан облысы
