Іс-шараға Қазақстан тарапынан Мәдениет және ақпарат министрлігі Архив, құжаттама және кітап ісі комитеті төрағасының орынбасары Роллан Құспан және Қазақстан Республикасының Гуанчжоу қаласындағы бас консулы Уәлихан Сәрсембеков қатысты.
Жәрмеңке шеңберінде Мәдениет және ақпарат министрлігінің, Қазақстан Республикасының Қытай Халық Республикасындағы елшілігінің, сондай-ақ «Beijing Glize Cultural Media Co., Ltd.» компаниясының қолдауымен Қазақстанның ұлттық павильоны таныстырылды.
Павильонда қазақ баспаларының басылымдары, қытай әдеби шығармаларының қазақ тіліне және отандық авторлар шығармаларының қытай тіліне аудармалары, сондай-ақ Қазақстанның сауда-экономикалық және туристік әлеуеті туралы ақпараттық материалдар ұсынылды.
Экспозиция қытайлық көрермендердің зор қызығушылығын тудырды. Жәрмеңке аясында «Абай жолы» кейіпкерлері және Абай» және «Абай. Өлеңдер мен поэмалар» атты жаңа басылымдардың тұсаукесері өтті.
Бұл еңбектер ұлы ақын мұрасын кең оқырман қауымға насихаттауға бағытталған. Іс-шараға Гуандун провинциясы насихат департаментінің өкілдері қатысты.
Жәрмеңкеге Біріккен Араб Әмірліктері, Вьетнам, Германия, Мысыр, Қатар, Қырғызстан, Малайзия, Нидерланд, Өзбекстан, Польша, Сингапур, Таиланд, Франция елдерінің баспалары мен мәдени ұйымдары қатысып жатыр.
