Каспий теңізінің жағалауында бес мемлекеттің әскери-теңіз күштері орналасқан. Қауіп-қатер төнген жағдайда қай елдің болсын сол жердегі күштері оны құрықтау қажет, тіпті кейде бірлескен операциялар да орындалады. Каспий айдынында әскери-теңіз күштерінің жауынгерлері алдымен қарсыластың кеме тобына бірлескен соққы беру амалдарын жасады. Бұл тапсырма әскери кемелер мен Ми-8 және Ми-35 тікұшақтарына жүктелді.
Сондай-ақ Зымыранды артиллериялық кемесінің командирі Ерлан Оспановтың айтуынша, шабуылдаушы жақтың кемелеріне, әуе нысандарына қарсы тойтарыс беру, су үсті диверсанттарының көзін жою жауынгерлік атыстары өткізілген. Әскери-теңіз күштері дабыл бойынша көтеріліп, нақты ұрысқа жақын жағдайда бөлімшелердің жауынгерлік дайындық деңгейін толық тексеруге мүмкіндік берген.
Су астынан жарылғыш заттар іздеп, апатқа ұшыраған кемені құтқаруға теңізшілер қатысты. Олар сондай-ақ теңізде кеме жүргізу машықтарын пысықтады. Әскери-теңіз күштері Каспий теңізінің орталық бөлігінде оқу-жаттығу штурмандық жорығын өткізген. Штурмандық дайындық бойынша штабтың жетекші маманы капитан-лейтенант Қуанышбек Дүйсембаевтың айтуынша, мұнда теңізшілер кемені басқару дағдыларын жетілдіріп, штурмандық қызметті ұйымдастыруды тәжірибе жүзінде меңгерді.
Сабақ барысында жауынгерлер теңіздегі әскери іс-қимылдар театрының ерекшеліктерін зерттеуге және түрлі кеме жүргізу әдістерін қолдану арқылы навигациялық міндеттерді де орындаған. Оқу жорығының қорытындысы бойынша штурмандық жауынгерлік бөлімшенің офицерлері сынақты сәтті тапсырған.
Теңіздегі практикалық операцияларға Әскери-теңіз күштері запастағы офицерлері алғаш рет қатысқан. Жиынға Шахмардан Есенов атындағы Каспий мемлекеттік технологиялар және инжиниринг университетінің әскери-теңіз кафедрасында бұрын оқыған 30 әскери міндетті тартылды. Олардың барлығы – корабльдерді штурманмен қамтамасыз ету, радиотехникалық байланыс құралдарын, сондай-ақ дизель-энергетикалық қондырғыларды пайдалану және жөндеу саласындағы мамандар.
Жиын аяқталған соң жақсы нәтиже көрсеткендерге заңнамаға сәйкес кезекті әскери шен берілді. Мұндай жиындарды өткізу резервті даярлау жүйесін дамытудағы және ел Әскери-теңіз күштерінің жауынгерлік әлеуетін нығайтады. Жедел-тактикалық оқу-жаттығудың қорытындысы бойынша, еліміздің теңіз әскеріне «Каспийдегі қауіпсіздікті қамтамасыз ете алатын деңгейде», деген баға берілді.
– Оқу-жаттығу қорытындысы бойынша жеке құрам жедел және тактикалық даярлық деңгейін арттырып, бөлімшелер арасындағы өзара іс-қимыл, сондай-ақ Каспий теңізінің отандық секторында қауіпсіздікті қамтамасыз ету жөніндегі міндеттерді тиімді орындау қабілеті бойынша қойылған мақсаттарға қол жеткізді, – деді бас қолбасшының орынбасары-ҚК ӘТК бас қолбасшысы басқармасы жауынгерлік даярлық басқармасының бастығы 1-дәрежелі капитан Данияр Хайрушев.
