Таяуда ғана Швейцарияның Гштаад қаласында аяқталған ATP 250 турнирінде топ жарған Александр Бублик өз жанкүйерлерін тағы да қуантты. Бұл жолы ол Аустрияның Кицбюэлінде жүлде қоры 596 035 еуроны құраған жарыста бас жүлдені олжалады. Тұсаукесер кездесуінде Тьяго-Агустин Тирантені (Аргентина) тізе бүктірген Бублик келесі кезеңде өзінің командалық әріптесі Александр Шевченкоға шаң қаптырды. Жартылай финалда нидерландық Ботик ван де Зандсхулды (Нидерланд) жеңген жерлесіміз финалда Артур Казаны қапы қалдырды. 1 сағат 26 минутқа созылған сайыс 6:4, 6:3 есебімен аяқталды. Бұл – А.Бубликтің АТР додаларындағы жетінші титулы.
АҚШ астанасы – Вашингтонда жүлде қоры 1 282 951 долларды құраған WTA турнирі мәреге жетті. Аталған жарыста еліміздің екі теннисшісі өнер көрсетті. Юлия Путинцева алғашқы айналымда «Үлкен дулыға» додаларының төрт дүркін жеңімпазы, әлемнің бұрынғы бірінші ракеткасы Наоми Осакадан (Жапония) ұтылса, Елена Рыбакина жартылай финалдық межеге дейін жетті. Еліміздің ең үздік ойыншысы Виктория Мбоко (Канада) мен Магдалена Френхты (Польша) ұтқанымен, одан кейін ойда-жоқта әлемдік рейтингте өзінен әлдеқайда төмен тұрған Лейла Фернандеске (Канада) есе жіберді. Бұл бәсекедегі барлық сет тай-брэйкке ұласты – 7:6, 6:7, 6:7. Дәл осы турнирдің ерлер арасындағы сайысында Бейбіт Жұқаев бақ сынады. Ол іріктеу сынынан іркілмей өткенімен, басты жарыстың бастапқы бәсекесінде Александр Мюллердің (Франция) осал тұсын таба алмады.
Биыл ғана жарақатынан айығып, енді-енді бабына келе бастаған Зарина Диас маусым айының аяғында Испаниядағы жарыстың жеңімпазы атанса, күні кеше ғана Португалияның Фигейра-да-Фош қаласында шымылдығы түрілген ITF турниріне қатысты. Пиреней түбегінде бірқатар қарсыласынан басым түскен ол жартылай финалда Мария Тимофееваға (Ресей) 2:6, 2:6 есебімен жол берді.
Финляндияның Тампересінде Дмитрий Попко мен Тимофей Скатов сәтсіз өнер көрсетті. Алғашқы айналымда Попко бельгиялық Жилем-Арно Байиден, Скатов франциялық Томас Фаруэлден ұтылды.
Сенбі күні Астанада еліміздің жазғы чемпионаты аяқталды. Ерлер арасында бас жүлдені 17 жастағы жас дарын Әмір Омарханов пен 27 жастағы тәжірибелі Георгий Ломакин өзара сарапқа салды. Бірінші сет 6:1 есебімен 17 жастағы Омархановтың пайдасына шешілді. Екінші сетте жарақат алуына байланысты Ломакин бәсекені жалғастырудан бас тартты. Қола жүлдені Ислам Орынбасар жеңіп алды. Әйелдер арасында Жібек Құламбаеваға тең келер ешкім табылмады. Финалда ол Аружан Сағындықоваға сан соқтырды. Үшінші орынды Іңкәр Дүйсебай иеленді.
