Облыс әкімі мерейтойға арналған штаб мамандарының есебін тыңдаумен қатар, аудан тұрғындарымен де тілдесті. Аймақ басшысы халыққа ауданның әлеуметтік-экономикалық жағдайы мен дамуы жөнінде мәлім етті. Абай ауданының әкімі Мейіржан Смағұлов 2024–2025 жылғы экономикалық даму көрсеткішті таныстырды. Кейінгі уақытта едәуір өсім бар. Өнім көлемі 4,3%-ға артып, 3,2 трлн теңге болған. Өсім негізі өнеркәсіп, сауда, ауыл шаруашылығы, құрылыс және көлік саласына тиесілі. Инвестиция көлемі 575,4 млрд теңгеге жеткен, оның 75,8%-ы – жеке инвестиция.
Аймақ басшысы атап өткендей, облыстағы 408 шақырым жылу желісінің 242 шақырымы ауыстыруды қажет етеді. Оның 25%-ы Абай ауданында орналасқан. Қарауыл ауылына 1,3 шақырым жылу желілерін салуға құжат әзірленіп, Ұлттық экономика министрлігіне бюджеттік өтінім жолданды. Қуанарлық жаңалық, биыл Абай ауданы бойынша «Аягөз – Қарауыл – Семей – Қайнар», «Семей – Қарауыл», «Қарауыл – Архат» бағыттарындағы жолдың бірнеше бөлігі жөнделеді. Бұған қоса Тоқтамыс, Қарауыл ауылдарындағы көшелерге асфальт төселеді. Архат, Кеңгірбай би, Құндызды ауылдарында су құбырын қайта жаңғыртуға да қаржы бөлінді.
Жиында аудан тұрғындары орталыққа қазандық салу, Семей сынақ полигоны аумағындағы халыққа жеңілдік жасау, полигон жерін ауыл шаруашылығы мақсатында пайдалануға беру, жедел жәрдем қызметін ауданға қайтару, жедел жәрдем көлігін алуға, Жидебай музей-қорығының материалдық-техникалық базасын жаңарту, жылыжай салу сияқты бірқатар ұсынысын айтты.
Абай ауданына үшінші рет жұмыс сапарымен барған аймақ басшысы ұсыныстардың барлығы құптарлық екенін, бәрі де кезең-кезеңімен жасалатынын, маңызды мәселелер үнемі назарда болатынын, ауданды дамыту той кезіндегі науқаншылдық емес, алда да жалғаса беретінін жеткізді.
Бұған дейін Абай ауданына бара қалсақ, интернеттің әлсіздігі біраз сарсаңға салатыны бар еді. Облыс әкімінің осы сапарында ол да оң шешім тапты. Абай мерейтойы қарсаңында Жидебай музей-қорығында Beeline ұялы байланыс операторының интернет желісі іске қосылды. Жоба облыстық бюджет есебінен жүзеге асқан.
– Ақпан айында ауданға жұмыс сапарымен келгенімде жергілікті әкімдік осы мәселені айтқан еді. Қолдап, облыстық бюджеттен қаржы бөлдік. Бұл тек Жидебайды емес, айналасындағы елді мекендерді интернетпен қамтамасыз етеді. 1 тамызда Бөрілі елді мекеніне антенна-діңгекті құрылғыны орнату жұмысы аяқталады. Осылайша, Абай тойында Абай ауданы, облыстағы 100% интернетпен қамтылған алғашқы аудан, – деді аймақ басшысы.
Сонымен қатар Абай ауданының орталығында оңалту орталығы ашылды. Семей полигонының зардабынан әлі айыға алмай жатқан азаматтарға Абай тойында жасалған бұл да бір игілікті іс болды.
Оңалту орталығының ауданы 310 шаршы метр, 13 кабинет 165 адамға қызмет көрсете алады. Үш бөлімшеде 31 қызметкер жұмыс істейді. Жартылай стационар 30 адамға, үйде қызмет көрсету бөлімшесі 125 адамға, отбасын қолдау орталығы 10 адамға арналған. Келушілерге физиотерапия, емдік дене жаттығулары, массаж, психологиялық қолдау, тіпті мүгедектігі бар жандарға кешенді оңалту қызметі ұсынылады. Орталықтың ел игілігіне қызмет етуіне аудан тұрғыны Сейфолла Рахымбаев зор үлес қосыпты. Ол өзінің екі қабатты ғимаратын мемлекетке тегін беріп, әлеуметтік жобаның іске асуына ықпал еткен. Аймақ басшысы орталыққа 16 орынды инватакси көлігінің кілтін табыс етті.
– Семей ядролық сынақ полигонының зардабы осы өлкеге, ұлылар мекені – Абай ауданына өлшеусіз кесірін тигізгені рас. 1949 жылдан 1989 жылға дейін жүргізілген 450-ге жуық ядролық жарылыстың салдары мыңдаған адамның денсаулығына, ұрпақ тағдырына, жер мен табиғатқа орны толмас зиян келтірді. Сол зардаптың салқыны бүгінге дейін сезіліп отыр. Радиациялық әсерден денсаулығы әлсіреген жандарға қолдау көрсету – біздің азаматтық әрі адамдық борышымыз, – деді облыс әкімі.
«Туған жерге туыңды тік» акциясы аясында Абайдың 180 жылдығына орай «Жидебай ұлттық ауылы» құрылып жатыр. Кешен Абай ауданындағы «Абай-Шәкәрім» кесенесі аумағында бой көтереді. Ғимараттың іргетасын қалау басталып та кетті. Оған облыс әкімі Берік Уәли, меценат Бектас Медғатов қатысты.
Абай ауданының тумасы, меценат Бектас Медғатовтың бастамасымен салынатын кешен 60 гектар аумақты қамтиды, кешеннің жалпы құны – 1,2 млрд теңге. Жоба мақсаты – өңірдегі туризмді дамыту, рухани-мәдени мұраны дәріптеу, Жидебайды халықаралық туристік бағыттардың біріне айналдыру.
Кешен жобасында жыл бойы жұмыс істейтін киіз үйлер мен бунгало үлгісіндегі қонақүйлер, этно-SPA орталығы мен қоғамдық тамақтану орындары бар. Сонымен қатар ипподром, хайуанаттар бағы, конференц-зал, тимбилдингке арналған аймақтар, электромобильдерді қуаттау стансалары мен қымыз құю желісі бар заманауи орындар болады. Жоба іске қосылса, 50 адамға тұрақты жұмыс орны ашылады. Бұл жергілікті тұрғындарды жұмыспен қамтуға, өңірдің туристік әлеуетін арттыруға оң әсер етеді.
Облыс басшысы жобаның Абай ауданының туризм саласын дамытып қана қоймай, экономикасына да жаңа серпін беретінін мәлім етті. Әкімнің айтуынша, меценат Бектас Шыңғысұлы Қарауыл ауылында аумағы 1 200 шаршы метрден асатын қонақүй құрылысын бастайды. Қонақүй кешенінде заманауи мейрамхана, кофехана, жазғы терраса, балалар ойын аумағы, бильярд залы болмақ. Бұған әкімдік тарапынан жан-жақты қолдау көрсетіледі.
Қарауылтөбе етегінде 400 орындық көрермен сиятын дала сахнасы, ат жарысына арналған шеңбер, киізүйлер қалашығы, 2 500 шаршы метрлік жәрмеңке алаңы, сонымен қатар жарық, су, кәріз желілері мен санитарлық-тұрмыстық нысандар лайықталып салынған екен. Қосымша жол төселіпті.
Абайдың 180 жылдық мерейтойын өткізуге арналған штабтың атқарушы хатшысы Жанжігіт Омархан, Абай тойының бас режиссері Жұлдызбек Жұманбай мәдени іс-шаралардың барысын пысықтады. Абай саябағында «Жеті қазына» республикалық фестивалінің ұйымдастырылуы талқыланды. Қазір бұл архитектуралық ескерткішті де қалпына келтіру жұмыстары жүріп жатыр.
Абай тойы мереке ғана емес, береке бастауы екені ауданға бағытталған игілікті істерден-ақ байқалады. Қарауылдағы қызу қарбалас тойға дайындықтың жоғары деңгейде жүргізіліп жатқанын білдіреді.
Абай облысы
