Фото: azattyq-ruhy.kz
Биылғы ақпан айында елімізге «БҰҰ-Әйелдер» құрылымының Еуропа және Орталық Азия өңірі бойынша өңірлік директоры Белен Санс Люке жұмыс сапарымен келген-ді. Сапар аясында Бейжің декларациясы мен іс-қимыл платформасының 30 жылдығы аясында және Тұрақты дамудың 5-мақсаты – гендерлік теңдікті қамтамасыз ету шеңберінде Орталық Азияның болашағына арналған жоғары деңгейдегі өңірлік кездесуі өткен.
Сонымен қатар елімізде Республикалық репродуктивті денсаулық апталығы ұйымдастырылды. Осы уақыт аралығында 20 мыңнан аса іс-шара өтіп, оған 500 мыңға жуық адам қатысты.
Ал өткен жылы Әйелдер құқығы мен балалардың қауіпсіздігін қамтамасыз ету мәселелері бойынша заң күшіне еніп, бұл шара отбасылық саясатты дамыту бағытындағы маңызды қадам болды. Аталған заң аясында Отбасын қолдау орталықтарының жұмысы қайта қаралып, олар бірыңғай үлгі бойынша жұмыс істей бастады. Нәтижесінде, орталықтар саны 33-тен 124-ке дейін үш есе артты. Жыл басынан бері бұл орталықтарға 100 мыңнан аса адам жүгінген, ал 5 мыңнан аса отбасына жан-жақты қолдау көрсетілген.
Астана, Шымкент, Түркістан, Қызылорда, Жамбыл, Маңғыстау, Батыс Қазақстан және Солтүстік Қазақстан облыстарында ОҚО-лардың жұмыс үдерістерін цифрландыру енгізілді. Ал жақын арада «Ата-аналар академиясы» – Ata-ana.kz онлайн платформасы іске қосылмақ.
Сонымен қатар отбасындағы әке мен ананың рөлін арттыру жұмыстары да жалғасып келеді. Аналар күніне орай еліміздің барлық өңірінде отбасын нығайтуға және әйелдердің қоғамдағы рөлін айқындауға бағытталған мыңнан аса іс-шара өтті. Әкелер күні қарсаңында Астанада «Әке. Отбасы. Қоғам» атты X республикалық әкелер форумы өтті. Оған белсенді ата-аналар, сарапшылар және қоғам өкілдері қатысты.
Қазақстан қоғамдық даму институтының жанындағы отбасылық және гендерлік саясат жөніндегі зерттеу орталығы өз жұмысын жалғастырып келеді. Атап айтсақ, тұрмыстық зорлық-зомбылықтың алдын алу бойынша Ұлттық есеп дайындау, Қазақстан қоғамындағы гендерлік стереотиптерді зерттеу, сондай-ақ Ақпарат және қоғамдық даму комитетінің сайтында «Гендерлік мұқтаждық пен қажеттіліктер картасы» арнайы бөлімін әзірлеу секілді жұмыстар жүргізіліп отыр.
Бұл қадамдар еліміздің әрбір азаматы тең құқық пен мүмкіндіктерге ие болатын әділетті әрі қауіпсіз қоғам құруға деген ұмтылысын айқын аңғартады.
