Қуанышты хабарды ести сала стритлифтингтен әлемнің жеті дүркін, қол күресінен әлемнің бес дүркін, кір тасын көтеру спортынан әлем чемпионы, кір спорты мен қол күресінен дүниежүзілік федерацияны ұзақ жыл басқарған Мұқан Ағзамовпен хабарласқан едік.
– Стритлифтинг – жылдам қарқынмен өсіп келе жатқан спорт түрі. Қазір әлемнің жүзге тарта елі осы спорт түрімен шұғылданады. Бұл жолы 17 мемлекеттен 560 саңлақ спортшы жүлделерді сарапқа салды. Ептілік, жоғары шеберлік, спорттың бірнеше түрін топтастырған сайыс елімізде де дамып келеді. Бір жыл бұрын Үнді елінің Хайдарабад қаласында өткен әлем чемпионатынан жеті алтын, екі күміс, бір қола медаль алып, командалық есепте үшінші орынға ие болған едік. Бұл жолы небәрі жеті саңлақ барып, бесеуіміз әлем чемпионы болып оралдық. Атап айтар болсам, бауырым Ерік (осымен төртінші рет), немерем Дінмұхамед 14-16 жастағы жасөспірімдер арасында, мен ардагерлер арасында, Иван Мальков пен Владимир Жайнақов алтыннан алқа тақтық, – деп мәлімдеді Мұқан Сағидоллаұлы.
М.Ағзамов ұзақ жылдан бері Ұлан ауданына қарасты Айыртау ауылында тұрады. Техника ғылымдарының кандидаты, профессор, ауыл шаруашылығының майталман маманы, кезінде оннан астам рационализаторлық жаңалықтарды өндіріске енгізген, жиырмадан астам өнертабыстық патенті бар. Мұқан Сағидоллаұлының шегірткені жоюға арналған қондырғысын өңірдің шаруа қожалықтары кеңінен пайдаланған. Сәрсен Аманжолов атындағы Шығыс Қазақстан университетінде жас кадрларға өз тәжірибесін үйретіп, дәріс оқиды. Ұзақ жыл кір спорты мен қол күресінен дүниежүзілік федерацияның вице-президенті, президенті болды. Әлем чемпионаттары мен Азия біріншіліктерінде кір спорты мен қол күресінен он екі рет жүлдегер, жеті рет чемпион атанды.
Ағзамовтар – спортшылар әулеті. Өткен жылы Мұқан Сағидоллаұлының бауыры Ерік Ағзамовтың ұлы Жан стритлифтингтен Азия федерациясының президенті, ұлы Жүрсін дүниежүзілік федерацияның вице-президенті болып сайланды. Екі Олимпиада ойындарына қатысқан, қазақ күресінен түйе балуан Руслан Сейілхановтың есімі спорт сүйер қауымға жақсы таныс. Русланның ұлы Саят та болашағынан үміт күтетін жас. Ұстаз, профессор, жаңашыл ғалым Мұқан Ағзамовтың бергенінен берері көп. Еліміздің атақ-даңқын бүкіл әлемге танытып жүрген спортшылар әулетінің шығар биігі әлі алда.
Оңдасын ЕЛУБАЙ,
Қазақстанның құрметті спорт қызметкері
Шығыс Қазақстан облысы,
Ұлан ауданы
