Сахнада 85 адам өнер көрсетті. Режиссер Фархад Молдағали қойған спектакльде жас сұлтан Бейбарыстың рөлін «Дарын» мемлекеттік жастар сыйлығының лауреаты Әсет Есжан сомдаса, ересек Бейбарыс кейпіне белгілі артист Оңдасын Бесікбасов енді.
Биыл XVII А.П.Чехов атындағы Халықаралық театр фестиваліне Қазақстан, Қытай, Бразилия, Үндістан, Оңтүстік Африка Республикасы, Иран, Армения, Аргентина, Колумбия және Бахрейн театрлары қатысып жатыр. Мұнда көрерменге ұсынбас бұрын ұйымдастырушылар әр спектакльді мұқият іріктеп, үздіктерін ғана таңдайды. Биыл «Алатау» дәстүрлі өнер театры Қазақстаннан шақырту алған жалғыз ұжым екен.
«Алғаш рет театрландырылған саундрама жанрын тамашаладым. Бір жарым сағат көзді ашып-жұмғанша өте шықты. Моссовет театры сахнасында қазақтың найзасы мен балтасы жарқ етті. Бұған дейін бұл сахнадан Чехов пен Пушкин туындыларын ғана көріп келген едік. Ал «Мәмлүк» – мүлде өзгеше дүние. Тарих тіріліп, жүрекке жетті. Саундрама жанры міндетті түрде жалғасын табуы керек. Қойылым соңында көрермендер актерлерді жібергісі келмеді. Мұның айғағы он минуттық толассыз шапалақ» дейді «Мир» телеканалының тілшісі Роман Белуков.
Қойылымда сөз аз, қимыл, пластика, би және тірі музыка эмоцияға толы. Жанры да, баяндау тәсілі де өзгеше. Кең тынысты бұл туынды поэтикалық формада өріліп, заманауи режиссерлік шешіммен дараланған. Көркем поэтикалық баяндауға құрылған.
«Мәмлүк. Сұлтан Бейбарыс» спектаклінің көрсетілімі А.П.Чехов атындағы Халықаралық театр фестивалінің шын мәніндегі айтулы оқиғасына айналды. Бұл — қазақ театрының заманауи тарихындағы айшықты, ерекше белес. Қойылымда халықтың рухын көтеретін тарих пен бүгінгі театр өнерінің озық тәсілдері шебер үйлесім тапқан. Мәскеу көрермені екі күн бойы орнынан тік тұрып қошемет көрсетті. Бұл – ортақ еңбектің, мәдени үндестіктің жарқын жемісі», деді А.П.Чехов атындағы Халықаралық театр фестивалінің бас директоры Карина Цатурова.
Инара ӘУБӘКІРОВА,
«Алатау» дәстүрлі
өнер театры
Әдебиет бөлімінің басшысы
АЛМАТЫ
