Акцияға жыл басынан бері өңір басшысы Ербол Қарашөкеев бастап, халық қалаулылары, зиялы қауым өкілдері, сан саланың қызметкерлері көп үлес қосты. Облыс орталығы Тараз қаласындағы бірқатар шағын ауданда мыңдаған көшет отырғызылды. Біршама уақыт бұрын Тараз қаласындағы «Әулиеата» ауданының «Мыңбұлақ» шағын ауданында «Таза аула» акциясы ұйымдастырылды. Науқанға жастармен бірге шағын аудан тұрғындары бір кісідей қатысып, тазалық жұмысын жүргізді.
«Белсенді жастар экологиялық акцияға қатысудан ешқашан бас тартқан емес. Облыс орталығы Тараз қаласының мұнтаздай таза болмауы – бәрімізге сын. Өйткені көне Тараз – еліміздегі жасыл қалалардың бірі. Науқанға шаһар тұрғындарының көптеп атсалысып жатқаны көңіл қуантады. Жергілікті тұрғындар табиғатты аялауды, қоршаған ортаға қамқорлықпен қарауды өмір салтына айналдырды. «Таза аула» акциясы барысында тұрғындардың көне шаһардың тазалығына жауапкершілікпен қарайтынын айқын сезіндік. Тазалық – мәдениеттің, өркениеттің белгісі. Қала халқы мұны жан жүрегімен түйсініп, облыс орталығын қоқыстан тазартуға жоғары жауапкершілікпен атсалысты», деді Тараз қалалық жастар ресурстық орталығы директорының орынбасары Камал Тұрлыхан.
Аптап ыстығы апшыны қуыратын жаз мезгілінің қытымыр мінезіне қарамастан, Байзақ ауданының халқы Сарыкемер ауылындағы Ағаділ Суханбаев атындағы саябақты қоқыстан тазартты. Қордайлықтар да экологиялық акцияға мүмкіндігінше үлес қосты. Меркі ауданының белсенділері тау шатқалдарына толып қалған қоқыстарды жинады. Тұрар Рысқұлов ауданының азаматтары «Жеңіс» саябағында тазалық жұмысын жүргізді.
«Тазалық ауладан басталады. Әрбір адам өзі тұратын өңірдің тазалығына жауапкершілікпен қараса, экологиялық мәдениет қалыптасады. «Таза Қазақстан» экологиялық акциясы барша азаматтың қоршаған ортаға құрметпен қарауына сеп болды. Оны көзбен көріп жүрміз. Аудан орталығының тазалығы бәрімізге сын», дейді Құлан ауылының тұрғыны Гүләйхан Маратқызы.
Жергілікті атқарушы билік өкілдері келтірген ресми дерекке жүгінсек, көктемгі абаттандыру және санитарлық тазалық айлығы аясында басталған «TazaLike», «Таза аула» «Таза қала», «Үлгілі аула» байқаулары өңірде тұрақты түрде өткізіліп жатыр. Байқау аясында үздік шыққандар арнайы марапаттарға ие болды.
Жалпы, жыл басынан бері Жамбыл облысында 803,8 мың шақырым каналдар мен арық жүйелері тазартылды. Сонымен қатар 79,2 мың тұрғын үй аулалары мен 2,7 мың шақырым көшеде тазалық жұмысы жүргізілді. Өңір бойынша 6,1 мың тонна қоқыс шығарылып, 286,9 мың көшет отырғызылды. 641,1 мың шаршы метр саябақ пен гүлзар аумағы тазартылды.
«Таза Қазақстан» экологиялық акциясы аясында «Жасыл әлемді бірге құрайық» тақырыбымен экологиялық акция ұйымдастырылған болатын. Оған өңір басшысы Е.Қарашөкеев бастаған лауазымды тұлғалар қатысты. Акцияға облыс аумағындағы 248 мектептен 10 375 оқушы лайықты үлес қосты. Оқушылар түрлі тақырыптағы байқауларда бақ сынады. Үздік шыққан озаттар өңір басшысының қолынан арнайы бағалы сыйлықтарға ие болды. Бір сөзбен айтқанда, Жамбыл облысында «Таза Қазақстан» экологиялық науқаны аясында қолға алынған өркенді істер ілкі сәтке де тоқтаған емес. Алдағы уақытта да ауқымды жұмыс атқарылмақ.
Жамбыл облысы
