Өлке тарихын тірнектеп жинап, аймақтағы музей ісінің негізін қалап, аты аңызға айналып кеткен айтулы тұлғаны кейінгі ұрпақ дәріптеп келеді. Ұлытау облысының тарихи-археологиялық музейінде облыстық мәдениет, тілдерді дамыту және архив ісі басқармасының қолдауымен «Туған өлке тарихының шырақшысы» атты өлкетанушы Сүтемген Бүкіров атындағы I Жас өлкетанушылар форумы өтті.
Облыстық форумға «Жас өлкетанушы» атағына үміткер 26 оқушының мақаласы келіп түсті. Ізденушілер Ұлытау өңірінің тарихи орындарын, жәдігерлерін, осы өңірде өмір сүрген тарихи тұлғалардың өмір жолдарын зерттеуге тырысқан. Байқауға техника ғылымдарының кандидаты, Қазақстанның құрметті металлургі Төлеген Бүкіров, М.Төрегелдин атындағы тау-кен және балқыту ісі тарихи музейінің басшысы Зейпін Қазанбаева бастаған археолог, өлкетанушылар қазылық етті. Олар жас өлкетанушылардың туған топырағының тарихын зерттеуге деген қызығушылығын, түйгенін терең жеткізе білу қабілетіне, ізденімпаздығына, зеректігіне аса мән берді. Жоба қатысушыларына экскурсия бөлімінің басшысы Э.Мұхамедина мен тарих және археология бөлімінің аға ғылыми қызметкері З.Ерзакова экскурсия жасап, музей залдарын аралатты.
Жүлдегерлер мен қатысушыларға ақшалай сыйақы табыс етілді. Сыйлық алып, кеудесіне «Жас өлкетанушы» белгісі тағылған балғындардың жүздері балбұл жанды.
Әкесінің атындағы форумға арнайы келген Гүлнәш Әубәкір апай жас өлкетанушыларға сәттілік тілеп, музей ұжымына «Қазақстанның Алтын кітабы» атты көлемді энциклопедия сыйлады.
Ұлытау облысының тарихи-археологиялық музейі Жезқазған, Сәтбаев, Қаражал қалаларынан, Жаңаарқа ауданы, Жезді, Жәйрем кенттерінен, Талап, Кеңгір, Ералиев ауылдарынан қатысқан талапкерлердің мақалаларынан «Туған өлке тарихының шырақшысы» атты жинақ құрастырып, қатысушыларға сыйлады.
Жас өлкетанушылар туған жердің тарихымен етене танысу үшін «Туған өлкемнің туристік маршруттары» атты бағытпен Теректі әулие мекеніне экскурсияға шықты.
Ұлытау облысы
