Әрине, кіл жүйрік қызмет ететін басылым болғандықтан, әрқайсысының орны бар. Әйтсе де, Кәрібай Иманжанұлы қызметін Көкшетауда бастағандықтан ба екен, мақалалары көзге жылыұшырап тұрады.
Алдыңғы жылы «Egemen Qazaqstan» газетінде өңірдегі бюджет қаржысын мақсатсыз жұмсау мәселесін түбегейлі зерттеп, «Мұндайларды бұрын бұйралап тастайтын» деген тақырыпта сыни, зерттеу мақала жазды. Осы мақала үлкен қоғамдық пікір тудырды. Кешегі кеңес заманында табаны тастан таймаған тарланбоздай ел игілігі үшін еңбек еткен аға буын бүгінгі есепсіз ысырапқа қатты таңғалып, жаға ұстағаны бар.
Кәрібай Мұсырман Солтүстік Қазақстан облысының жердің шетінде, желдің өтінде жатқан шалғайдағы шағын ауылдарының мәселесін көтеріп, жариялады. Біздің өңір үшін бұл – өте өзекті мәселе. Көптің көкейінде жүрген сойылдай мәселені жазған журналист «дерттің» диагнозын дәл қойып отыр. Автордың айтуынша, мұның екінші жағы да бар. Туған тіліміз тұтқырланып, кірпігі ғана қимылдап жатқан шақта қаймағы бұзылмаған оңтүстіктен бет бұрған ұлы көшпен бірге еңбек адамы ғана емес, сан ғасыр бойы халқымызбен бірге жасасып келе жатқан әдемі дәстүр, сәулелі салт бірге келер еді. Міне, сол сәтте солтүстіктегі тыңның эпицентрі атанған өлкенің өңі өзгеріп, қазақыланып қалар еді.
Біздікі – төл мереке қарсаңында жазғаны жанымызға жаққан жампоз журналиске деген жалпақ елдің көзқарасын жеткізу ғана. Ел барда «Egemen Qazaqstan» жасай береді.
Бақыт СМАҒҰЛ,
«Белсенді ұзақ өмір» орталығының директоры
Көкшетау
