«Еліміздегі шикізат өндіруші ең үлкен компанияның бірі «Теңізшевройлдың» әріптестік байланыс орнату ниетімен Шымкентке арнайы келуі – қуантарлық жағдай. Осы сәтті пайдаланып мұнай өндіруші компанияға мегаполистің кәсіпкерлік саласындағы бар әлеуетін көрсетуге тырысамыз. Бірінші кезекте жергілікті тауар өндірушілердің көрмесін ұйымдастырдық. Оған қаламыздағы 20-ға жуық ірі кәсіпорын қатысып, өнімдерін қонақтар назарына ұсынды. «Теңізшевройл» басшылығы жергілікті тауар өндірушілердің өнімдерімен жеке-жеке танысып шықты. Өздерін қызықтырған кейбір тауар түрі бойынша кәсіпорын басшылығымен арнайы сұхбат жүргізді. Жалпы, ТШО делегациясының Шымкентке жасаған сапары 3 күнге созылып, тиімді сауда-экономикалық уағдаластыққа қол жеткіздік», дейді Шымкент қалалық кәсіпкерлер палатасы директорының орынбасары Бауыржан Бердалиев.
Сапар барысында мұнай өндіруші компания өкілдері гидравликалық және суасты сорғыларын өндіретін «Karlskrona LC AB», 25-500 МВА қуаттылығындағы трансформаторлар шығаратын «Asia Trafo», электр құрылғыларын өндіруші «Renaissance SHIK», майлау материалдарын шығаратын «HILL Corporation», мал бордақылап, ет өңдеумен айналысатын «Baiterek Agro» кәсіпорындарын аралап жұмыстарымен танысты.
Бұл кәсіпорындардың барлығы жоғары технологиялы өнім шығарады. Өнімдері ішкі нарықтан бөлек, алыс-жақын шетел нарығына да экспортталып жатыр. Мәселен, «Karlskrona LC AB» кәсіпорны түрлі көлемдегі сорғылар шығарумен танымал. Әсіресе оның өнімдері мұнай саласында, уран басқа да қазба байлықтар шикізаты өндірісінде кеңінен пайдаланылып жүр.
Қуаттылығы 25-500 МВА-ға тең трансформатор өндіретін «Asia Trafo» өндіріс орнын да мегаполистегі ең ірі кәсіпорындардың қатарына жатқызуға болады. Елдегі жоғары кернеулі трансформаторларды тек осы кәсіпорын шығарады. Трансформаторға керекті көптеген бөлшекті де өздері жасайтындықтан нағыз отандық өнім шығаратын өндіріс деуге толық негіз бар.
Қалалық әкімдік пен «Мұнай-газ машина жасау саласын дамытуға арналған халықаралық орталық» қауымдастығы арасында ынтымақтастық туралы меморандум жасалды. «HILL Corporation» компаниясы мен «Теңізшевройл» ЖШС арасында тауар жеткізуге қатысты келісімшарт бекітілді. Сонымен бірге жергілікті тауар өндірушілер «Барыс-2007», «Baiterek Agro», «Intermilk Kazakhstan» кәсіпорындары мен «Eurasia Support Services» компаниясы арасында азық-түлік өнімдерін жеткізу саласындағы өзара түсіністік туралы меморандумдар түзілді.
Қорыта айтқанда, «Теңізшевройл» өздеріне қажетті азық-түлік пен техникалық дайын өнімдерді Шымкенттен тасымалдаймыз деп шешті.
ШЫМКЕНТ
