Маңғыстау облысы Жаңаөзен қаласы да спорт саласына айрықша көңіл бөліп, ауылда, қалада балалар ойнайтын алаңшалар, воркауттар, жаңа спорттық кешендер ашып, жұртшылықты қуантып келеді. Жалпы, жаңаөзендіктердің спортқа деген бетбұрысы елеулі. Бұрындары спортпен негізінде жастар шұғылданатын болса, кейінгі кездері стадионда, спорт алаңдарында үлкен кісілер таңнан жаттығу жасап жүргенін жиі көретін болдық. Бұл – ел саламаттылығындағы сабақтастықтың жақсы нышаны.
Таяуда Әмин Тұяқов атындағы орталық стадионда республикалық спорт фестивалі өтті. Жаңаөзенде өткен тұңғыш фестиваль дзюдо, грек-рим, еркін күрес ойындарын қамтыды.
Фестивальға 12 өңірден 600-ден астам спортшы қатысып, аталған спорт түрлерінен бақ сынады. Жарыс ел бірлігі мен отаншылдық деңгейді көрсетті. Сонымен қатар 16–17 мамырда Қазақстанның еңбек сіңірген жаттықтырушысы, мұнайшы Жеңіс Жарылғапұлын еске алуға арналған ересектер арасындағы ІІІ республикалық ашық турнирдің финалы өтті. Шараға Астана, Алматы, Атырау, Ақтөбе өңірлерінен және көршілес Ресей Федерациясы Башқұртстан, Өзбекстан, Әзербайжан елдерінен боксшылар қатысты. Бір мәнді оқиға: финалдан соң, көрермендер үшін кәсіби бокстан арнайы кездесу ұйымдастырылды. Рингке жерлесіміз, жаңаөзендік спортшы Уәлихан Бисенқұлов пен камерундық кәсіпқой боксшы Кристиан Вуапи шықты. Аса тартысты жекпе-жекте айқын басымдықпен Уәлихан Бисенқұлов жеңді.
Ел тарихына енетін спорттық іс-шаралардың Жаңаөзен қаласында ұйымдастырылуы өңір жастарын ынталандырып, жұртшылықты серпілтіп тастады. Әрине, бірінші кезекте бұған себепші – Жаңаөзен қаласы әкімдігінің спортқа деген мемлекетшіл жауапты көзқарасы. «Жас келсе – іске» демекші, «Жаңаөзен – спортшылар қаласы» деген ұранды сөзбен емес, нақты іспен дәлелдеп жүрген Жансейіт Қайнарбаевтың еңбегін ерекше атап өткіміз келеді. Алдағы уақытта сүйікті қаламыз Жаңаөзенде мықты бапкерлерден дәріс алған олимпиаданың күміс жүлдегері Әділбек Ниязымбетов, Еуропа чемпионы Бекзат Нұрдәулетов секілді талай әлем танитын жеңімпаздар шығатынына сенімдіміз.
Асқар НОҒАЕВ,
Жаңаөзен қалалық мәслихатының депутаты
