Көрнекті сәулетші алдымен Шырақбек Қабылбаев атындағы Қостанай академиясының курсанттарымен жүздесті. Академия ұжымы алаңға сап түзеп, Мемлекеттік рәміздерге құрмет рәсімін өткізді. Салтанатты жиында академия бастығы, полиция генерал-майоры Ақынқали Дәрменов сөз сөйлеп, қадірлі мейманға оқу орны ұжымының атынан алғыс айтты.
«Бүгін – біз үшін айрықша күн. Мемлекеттік елтаңбаның авторы Жандарбек Мәлібекұлын академия қабырғасында қарсы алып, құрмет көрсету – біз үшін үлкен мәртебе. Сіздің қолыңыздан шыққан Елтаңба – ел тарихы мен руханиятының, ұлтымыздың мәдениеті мен болмысының айшықты бейнесі. Бұл – егемендігіміздің, бірлігіміз бен айбынымыздың нышаны. Сіздің осы бағыттағы еңбегіңіз – ұрпаққа үлгі боларлық баға жетпес мұра», деді академия бастығы.
Жандарбек Мәлібеков курсанттарға Елтаңбаның идеялық мазмұны, тарихи тамыры мен көркемдік ерекшелігі жайында әңгімелеп берді.
«Еліміздің ертеңі, болашақтың кілті осында сап түзеп тұрған жас сарбаздардың қолында. Сіздерге осыны жете түсініп, сапалы білім алып, болашақта елге адал қызмет ету – парыз. Ата-бабамыз аңсаған, Алаш арыстары армандаған тәуелсіздігіміз мәңгі жасасын! Өңірлеріңіз өркендеп, еліміз гүлдене берсін. Ол үшін жастар білімді, саналы, елжанды болуы қажет. Білім мен еңбек жолында аянбай тер төгіп, ел мүддесі үшін қызмет етіңіздер», деді Ж.Мәлібеков.
Елтаңба авторы одан кейін Ыбырай Алтынсарин атындағы музейге барып, жергілікті зиялы қауым өкілдерімен кездесті. Басқосуда Елтаңбаның жасалу тарихы, ұлттық сәулет өнері туралы әңгіме болды. Қадірлі мейман Алаш баласы үшін қастерлі дүниеге айналған Елтаңба бедерінде көрініс тапқан нышандарға тоқталып, әр белгінің нендей мағына беретінін айтып берді.
Кеш соңында Жандарбек Мәлібеков Ыбырай Алтынсарин музейіне «Қазақстан Елтаңбасы» кітабы мен Елтаңба төсбелгісін тарту етті.
Елтаңба авторы келесі күні мемлекеттік қызметшілерге рәміздерді дұрыс пайдалану, орнату, орналастыру тәртібі жөнінде семинар өткізді. Іс-шара барысында мемлекеттік рәміздердің шығу тарихы, қазіргі қолданыстағы жағдайы, мемлекеттік рәміздерді жасап шығаратын кәсіпорындардың жұмыс сапасын бақылау мәселелері талқыланды.
«Мемлекеттік рәміздерді дайындауда сапа мен барлық талаптың сақталуына ерекше көңіл бөлеміз. Ең бастысы, тапсырыс беруші техникалық сипаттаманы дұрыс толтырып жіберуі қажет. Өйткені кейде дұрыс толтырылмаған құжаттардың салдарынан біздің атымызға жағымсыз пікірлер айтылып қалып жатады. Біз жұмысымызды сол құжат негізінде ғана жүргіземіз және оған ешқандай өзгертулер енгізбейміз. Қазіргі технологиялар өте дамыған, автоматтандырылған құрылғылармен жұмыс істейміз. Бұл бізге өнімнің сапасын жоғары деңгейде қамтамасыз етуге мүмкіндік береді», деді мемлекеттік рәміздерді дайындап шығаратын жеке кәсіпкер Жандос Тынымбаев.
Семинарға қатысушылардың айтуынша, Техникалық реттеу және метрология комитеті мемлекеттік рәміздерге қатысты мемлекеттік бақылауды тұрақты жүргізеді. Қандай да бір кемшілік анықталса, тиісті түзету енгізу үшін ескертпе беріледі.
«Жыл сайын белгіленген кестеге сай рәміздерді қолдану бойынша стандарттарды түсіндіру және мониторинг жүргізу жұмыстарын жүзеге асырамыз. Біздің мекемеде 988 стандарт бекітілген. Өндірушілердің техникалық жабдығының болуы, лицензияларының бар-жоғы тексеріледі. Сонымен қатар сызықтар мен өлшемдерге, түсі мен сапасына қойылатын талаптар қатаң бақыланады. Мемлекеттік елтаңбаның сапасына жауапкершілікпен қоса, стандарт талаптарын да өндірушілер сақтауға міндетті», дейді Техникалық реттеу және метрология комитеті Қостанай облыстық департаментінің басшысы Нұргүл Шодорова.
Семинар барысында мемлекеттік рәміздер заң белгілеген талапқа сәйкес келмесе, 20 АЕК-тен 900 АЕК-ке дейін айыппұл салынатыны айтылды. Алайда соған қарамастан, аталған талапты әлі де сақтай бермейтін мекемелер кездесіп қалып жатады. Сондықтан жиынға қатысушылар мемлекеттік рәміздерге қатысты біркелкі талаптарды қамтитын жадынама шығару керек деген ұйғарымға келді.
Кездесу соңында облыс әкімінің орынбасары Бақытжан Нарымбетов Елтаңба авторына бүкіл облыс тұрғындарының алғысын жеткізіп, мұндай тағылымды іс-шаралардың көпшіліктің көкейіне Отанға деген сүйіспеншілік, мемлекетшілдік рухын орнықтыратынын айтты.
Қостанай облысы
