Өңірлердің өркенін тек өндіріспен байланыстыру қазіргі кезде қисынсыздау. Себебі қазір туризмен бір өңірді ғана емес, бүтін бір елді қамтамасыз етуге болатынын әлемдік тәжірибе көрсетіп отыр. Мұны Президент Қасым-Жомарт Тоқаев Ұлттық құрылтайдың биылғы отырысында да айтып, туризм аймақтық дамуға серпін беретін сала екенін айтты.
Мысалы, Абай облысы десе ең алдымен еске түсетін тарихи нысандар мол. Бұл өңір – Абай Құнанбайұлы, Шәкәрім Құдайбердіұлы, Мұхтар Әуезов сынды ұлы тұлғалардың ізі қалған, Алаш ту тіккен тарихи мекен. Семей полигоны – ядролық сынақтар өткен қасіретті аймақ, Қоңыр әулие үңгірі – емдік қасиеті бар орын, Ертіс өзені – өңірдің негізгі су артериясы, әсем Тарбағатай таулары – табиғатың нағыз тал бесігі. Бұған қоса Семей қаласындағы тарихи ғимараттар мен мемориал-музейлердің орны мүлде бөлек. Бұл ретте Семей қаласының өзі үлкен бір туристік жобаға сұранып-ақ тұр. Елімізде мұндай тарих пен табиғаттың үйлесімі Орал мен Семейде ғана бар деуге болады.
Өңірдің осындай артықшылығын кеңінен зерттеген жергілікті билік жуырда Абай облысында тағы бір жағымды жаңалықты жария етті. Облыс әкімі Берік Уәли аймақта Туризм басқармасы құрылатынын мәлімдеді.
Мамандардың айтуынша, бұл шешім өңірдің туристік инфрақұрылымын жүйелі түрде дамытуға, ішкі және сыртқы туризмнің өркендеуіне серпін бермек. Өйткені қазір өңірдің ең басты туристік нысандарының бірі – Алакөлге деген сұраныс жылдан-жылға артып келеді. Бұл үрдіс облыс үшін үлкен мүмкіндіктерге жол ашады.
Осы орайда Абай облысының әкімі Мақаншы ауданына жасаған жұмыс сапары барысында Алакөлдің жағдайымен танысып, туристік маусымға дайындықты пысықтады. Алакөлдің инфрақұрылымын жақсарту мақсатында заманауи қоқыс жәшіктерін көбейту, қоғамдық әжетханалар санын арттыру, жағалауды абаттандыру, емдік балшық аймағын ретке келтіру, балаларға арналған ойын алаңдарын салу, өрт қауіпсіздігін күшейту секілді маңызды істер қолға алынып жатыр. Бұл бастамалар демалушылар мен ем алушыларға қолайлы жағдай жасап, туристердің санын одан әрі арттыруға мүмкіндік беретіні сөзсіз.
Бұған қоса Абай облысының бірегей табиғи және тарихи-мәдени мұраларын қамтитын бірнеше туристік бағыттары қалыптасып үлгерді. Айталық, Бесқарағайдағы Шошқалы көлі, Абай ауданындағы Құнанбай әулетінің қорымы, Қоңыр әулие үңгірі, Жидебайдағы «Абай-Шәкәрім» кесенесі, Бөрілідегі Мұхтар Әуезов музей-үйі, Үржар ауданындағы «Тарбағатай» ұлттық паркі, Аягөз ауданындағы «Қозы Көрпеш – Баян сұлу» мазары, Мақаншыдағы «Барлық Арасан» шипажайы, Шүлбі су қоймасы, тағысын-тағылар. Бұл туристік нысандар тек ішкі ғана емес, халықаралық деңгейдегі туристердің де қызығушылығын тудырып отыр.
Туризмді дамыту үшін білікті мамандар даярлап, қызмет сапасын жақсарту керек. Облыстағы туристік кәсіпкерлікті қолдау, инфрақұрылымды нығайту, экотуризмді дамыту өңірдің экономикалық әрі әлеуметтік өрлеуіне ықпал етеді.
Қорыта айтқанда, Абай облысының туризм саласындағы әлеуеті зор. Бұл саланың аясын кеңейте түссе өңірдің дамуына септігі мол тиеді. Осы ретте туристік нысандарды дамытуға мемлекеттік қолдау көрсетілсе, жергілікті билік бағдарлы, белсенді қызметі арқылы өлкені еліміздің сындарлы саяхат орталықтарының біріне айналдыруға бар күш-жігерін жұмсауға дайын.
Абай облысы
