Көлік-логистика, геологиялық барлау, ауыл шаруашылығы, цифрландыру, денсаулық сақтау, білім беру және тағы басқа салалардағы өзара іс-қимылды кеңейтуге назар аударылды.
Қазақстан Ауғанстанның негізгі сауда серіктестерінің ондығына кіреді. Өткен жылы тауар айналымы 545,2 млн долларды құрады, оның ішінде қазақстандық өнімнің экспорты – 527,7 млн доллар.
Тургунди-Герат трансауған темір жолын салу мәселелері талқыланды. Жобаны іске асыру өңір үшін стратегиялық маңызға ие. Ауғанстан Орталық және Оңтүстік Азия арасындағы көпір болып саналады және «Солтүстік-Оңтүстік» дәлізінің тиімділігін арттыруда маңызды рөл атқара алады. Ауғанстан аумағында қатты пайдалы қазбаларды геологиялық барлау, өндіру және өңдеу бойынша бірлескен жобаларды іске асыруға отандық компаниялардың қатысу жоспарлары қаралды.
«Қазақстан өңірдің орнықты дамуы үшін халықаралық қоғамдастықтың күш-жігерін шоғырландыруға ұмтылады. Бүгінде еліміз Ауғанстанның негізгі сауда серіктестерінің ондығына кіреді және Ауғанстандағы азық-түлік дағдарысын еңсеру бойынша халықаралық серіктестермен және ұйымдармен белсенді ынтымақтасады. Қазақстан Ауғанстан нарығына астық пен ұнның сенімді жеткізушісі болып қала береді. Астықтың басқа түрлерін, мал шаруашылығы өнімдерін, кондитерлік және ұн өнімдерін жеткізуді бастауға дайынбыз. Жалпы, біз тауарлар номенклатурасын кеңейтуге мүдделіміз. Сол үшін Гератта да «Қазақстанның сауда үйін» аштық және Кабулда да қазақстандық сауда үйін ашуға ниеттіміз», деді О.Бектенов.
Нуриддин Азизи Ауғанстанның Қазақстанмен бірлескен жобаларды іске асыру саласындағы өзара іс-қимылды кеңейтуге мүдделілігін жеткізді. Кездесуге қатысушылар отандық ауыл шаруашылығы техникасын Ауғанстан нарығына экспорттау келешегін ерекше атап өтті.
Бұдан бөлек, жақында Алматыда ашылған БҰҰ Өңірлік орталығының Орталық Азия және Ауғанстан үшін орнықты даму мақсаттары жөніндегі қызметіне назар аударылды, ол өңірдің тұрақтылығын нығайтуға және қарқынды дамуына елеулі үлес қосады.
Кездесу қорытындысы бойынша тараптар барлық бағыттар бойынша жан-жақты өзара тиімді ынтымақтастықты нығайту ниеттерін жеткізді.
