- Бакуде шағын футболдан өтіп жатқан әлем чемпионатының топтық турнирінің соңғы матчында еліміздің құрамасы АҚШ-тан 5:3 есебімен басым түсті. Бірақ осы жеңістің өзі аяқдоп шеберлерімізге плей-офф сайысына жолдама алуға жеткіліксіз болды. Өз тобында Босния мен Герцеговина, Польшаны алға жіберген жерлестеріміз үшінші орын алып, аталған жарысты аяқтады.
- Астанада әйелдер күресінен ел кубогі жолындағы жарыс аяқталды. Жарыста мына бұрымдылар алтыннан алқа тақты: 50 кг – Светлана Анкичева (Астана), 53 кг – Ирина Жәнібекова (Қарағанды), 55 кг – Зүлфия Яхьярова (Қарағанды), 57 кг – Лаура Әлмағамбетова (Қостанай), 59 кг – Виктория Хусаинова (Ақмола), 62 кг – Тыныс Дубек (Алматы облысы), 65 кг – Елена Шалыгина (Астана), 68 кг – Бейбіт Сейдуалы (Шымкент), 72 кг – Әлбина Қайыргелдинова (Ақмола), 76 кг – Елмира Сыздықова (Қарағанды).
- Астанада көркем гимнастикадан еліміздің чемпионаты өз мәресіне жетті. Жекелеген көпсайыста Айым Мейіржанова (Астана) алтыннан алқа тақса, Эрика Жайлауова (Астана) мен Милана Парфилова (Шымкент) екінші, үшінші орындарды еншіледі. Топтық жаттығуда елордалық арулар алдарына жан салмады. Олар жалпыкомандалық есепте де жеке-дара көш бастады.
- Ресейлік Софья Лансеремен жұп құрған Сандуғаш Кенжебаева Қытайдың Маньшан қаласында ұйымдастырылған ITF турнирінде топ жарды. Финалда олар Мэйки Го (Қытай)/Пеангтарн Плипуечті (Таиланд) 6:3, 3:6, 10:8 есебімен ұтты. Бұл – Сандуғаштың биылғы маусымдағы төртінші титулы. Бұған дейін қазақ теннисшісі Түркияның Антальясында өткен үш турнирде бас жүлдені олжалады.
- Маусым айының алғашқы онкүндігінде Германияда тректегі велоспорттан төрт бірдей дүбірлі дода өтеді. Олар – «Bahnen-Tournee» (1 маусым), «Oberhausener Nachtrennen» (6 маусым), «Bahnen-Tournee Darmstadt» (7-8 маусым), «Dudenhofen» (9 маусым). Неміс жеріндегі жарыста ел намысын Рамис Дінмұхамедов, Әлішер Жұмақан, Илья Карабутов, Андрей Чугай, Кирилл Курдиди, Рамазан Мұхтар, Данияр Шаяхметов сынды велошабандоздар қорғайды.
