Әлем мемлекеттері арасындағы сенім әлсіреп, геосаяси шиеленістер күшейіп, диалогтің орнына үнсіздік жайлап барады. Осындай кезде Қазақстан ұйымдастырып отырған мұндай форумдар – шын мәнінде стратегиялық маңызы бар бастама.
Астана форумы қатардағы пікір алмасу алаңы емес. Бұл – әлемдік сенімді қалпына келтіру жолындағы нақты қадам. Мұнда Шығыс пен Батыс, Солтүстік пен Оңтүстік өкілдері бір үстел басында отырып, ашық сөйлесе алады. Қазіргідей фрагменттелген, яғни бөлшектеніп кеткен әлемде осындай диалог алаңдары маңызға ие болып отыр.
Мен үш жыл бұрын саясаттан кеткен соң, киберқауіпсіздік пен жасанды интеллект саласында жұмыс істеп келемін. Қазір өзім басқаратын компания мемлекеттер мен маңызды инфрақұрылымдарды кибершабуылдардан қорғау үшін әлемнің әр түкпірінде жұмыс істейді. Саясат сахнасынан кетсем де жаһандық үрдістерге бейжай қарай алмаймын.
Себебі бүгінгі әлем сенім дағдарысына ұшыраған. Бұл дағдарыстың шешімі – кездесіп, ашық диалог орнату. Бір-бірімізді тыңдай алу, түсіне білу – болашақтағы тұрақтылықтың кепілі. Осы тұрғыдан алғанда, Астана халықаралық форумы – мемлекеттерді қайта жақындастыратын, сенімді қайта оятатын бірегей платформа.
Себастьян Курц,
Аустрияның экс-канцлері, кәсіпкер
