Сурет: primeminister.kz
Онда бірлескен жобаларды іске асыру барысы, цифрландыру саласындағы ынтымақтастық сөз болып, екіжақты өзара іс-қимылдың басым бағыттары қаралды. Тараптар инфрақұрылымды жаңғырту шеңберінде ынтымақтастықты кеңейту келешегі жөнінде пікір алмасты.
«Қазіргі уақытта Президентіміздің тапсырмасы бойынша инфрақұрылымды жаңғырту, оның ішінде энергетикалық және коммуналдық инфрақұрылымды жақсарту бойынша белсенді жұмыс жүргізіліп жатыр. Осыған байланысты өткен жылы Үкімет «Энергетикалық және коммуналдық секторларды жаңғырту» ұлттық жобасын бекітті. Энергетикалық инфрақұрылымды, су құбыры желілері мен сумен жабдықтау нысандарын жаңғырту бойынша сараптама және жаңа технологияларға қол жеткізу бөлігінде сіздермен жемісті ынтымақтастық орнатамыз деп үміттенеміз», деді Олжас Бектенов.
Атап айтқанда, банк инновациялық технологияларды қоса алғанда, жобалауды оңтайландыру, минималды операциялық шығындармен экономикалық инвестицияларды жүзеге асыру және экологиялық мәселелерді шешу бойынша мемлекеттік органдардың жұмысына халықаралық озық тәжірибені енгізе алады.
Үкімет басшысы трансшекаралық су жобалары аясындағы өзара іс-қимылдың маңыздылығын атап өтті. Сондай-ақ автожол, теміржол және логистикалық инфрақұрылымды дамыту жөніндегі ауқымды бағдарламаны іске асыруға назар аударылды. Бірлескен жобаларды іске асыруға тартылған отандық компаниялардың үлесін арттырудың маңыздылығы да айтылды.
Қазір еліміз автомобиль мен теміржолдардың ұзындығын ұлғайтуды, олардың сапасын, өткізу қабілетін және экологиялық тұрақтылығын арттыруды көздеп отыр. Сондықтан Қарағанды – Жезқазған автожолы, Алматы айналма жолы және Дарбаза – Мақтаарал теміржол желісі сияқты жобалар бойынша бірлескен жұмыстарға ерекше мән беріледі.
Тараптар Арал теңізінің солтүстік бөлігін қалпына келтіру жобасының бірінші кезеңін іске асыру нәтижелеріне де тоқталды. Цифрландыру және ЖИ саласындағы ынтымақтастық жайы да қарастырылды.
Кездесу соңында тараптар серіктестікті одан әрі кеңейтуге және жаңа бірлескен бастамаларды іске асыруға дайын екенін жеткізді. Антонелла Бассани Дүниежүзілік банктің ынтымақтастықты арттыруға дайын екенін және Қазақстан жариялаған жобаларды қолдап, осы бағыттар бойынша одан әрі жұмыс істеуге мүдделі екенін атап өтті. Дүниежүзілік банктің мәліметінше, 1992–2024 жылдар аралығында екі жақты ынтымақтастықтың нәтижесінде 8 млрд доллар сомасына 48 жоба іске асырылды.
