Бүгінгі күннің басты міндеті – тек қазіргі жұмысшылардың әл-ауқатын жақсарту ғана емес, сонымен қатар ертеңгі өндіріс көшін алға сүйрейтін жас мамандарды дер кезінде қолдап, оларға сапалы білім мен кәсіби дамуға нақты мүмкіндік беру. Бұл – ел болашағына бағытталған берік әрі ұзақмерзімді инвестиция.
Болашақ инженерлердің жеңісі: отандық оқушылар Хьюстонда топ жарды
Өткен айда «Самұрық-Қазына» қолдауымен отандық оқушылар АҚШ-тың Хьюстон қаласында өткен FIRST халықаралық роботтехника чемпионатында ерекше нәтиже көрсетті.
6 мен 18 жас аралығындағы командалар ел намысын абыроймен қорғап, Champions Award және Inspire Award сынды беделді марапаттарды иеленді.
Кейінгі жылдары Қазақстанда инженерлік және техникалық білімге қызығушылық артып келеді. Бұрын елге небәрі 4 квота бөлінсе, биыл 7 квота ұсынылып, оған Алматы, Астана, Қарағанды және Павлодар қалаларынан 86 оқушы ие болды.
1000 топ пен 50 000 адамның арасындағы бұл жеңіс – тек оқушылар үшін емес, бүкіл ел үшін үлкен мақтаныш.
20 жас үшін 3 жыл тегін: «Samruk Umiti» жобасы оқушыларды қолдады
Жұмысшы мамандықтарын қолдау мақсатында биыл сәуір айында іске қосылған «Samruk Umiti» бағдарламасы Павлодар және Шығыс Қазақстан облыстарындағы балалар үйлерінің 100 тәрбиеленушісін қамтыды. Бүгінде олардың 28-і өз болашағын жұмысшы мамандықтарымен байланыстыруға шешім қабылдады. Бұл – әлеуметтік осал топтағы балаларға өмірлік жол сілтейтін мүмкіндік.
Жуырда Өскемендегі ГЭС бойынша ұйымдастырылған сапар барысында «Samruk Kazyna» компаниялар тобы атынан 20 бала «Электрэнергетика» мамандығы бойынша қаладағы Жоғары политехникалық колледжге толық мемлекеттік грантта оқуға жолдама алды. Оқу ақысы мемлекет есебінен өтеледі, стипендия – 41 мың теңге, жатақхана мен үш мезгіл тамақ – тегін. Үш жыл ішінде студенттер кәсіпорында тәжірибеден өтіп, үздіктері тұрақты жұмыс орнымен қамтылады деп жоспарланып отыр.
Жоба іске қосылғанына небәрі бірнеше ай ғана болса да, алғашқы нәтижесін көрсетті. Бұл – «Samruk Umiti» бастамасының қажеттілігі мен тиімділігін дәлелдейтін нақты қадам.
Өңірге оралар білікті мамандар: 177 жас – кәсіп жолында
Маңғыстау облысында жұмысшы мамандықтарының мәртебесін көтеріп, өңір экономикасын әртараптандыруға бағытталған бірегей бағдарлама – жастарға нақты бағыт беріп, сенім ұялатқан бастама. «Samruk-Kazyna» қорының қолдауымен үш жыл ішінде 177 жасөспірім еліміздің 10 өңіріндегі техникалық колледждерге оқуға түсті.
2023 жылы алғашқы 2 түлек оқуын тәмамдаса, былтыр бұл көрсеткіш 36 адамға жетті. 38 диплом алған маманның 30-ы жоғары оқу орнына түсіп, 4-і жұмысқа орналасып үлгерді.
Биыл 72 қатысушы колледж дипломын алуға дайындалып жатыр. Олардың тең жартысы – жұмысшы мамандықтар иегері.
Бағдарлама түлектері – болашақ инженерлер, энергетиктер, тау-кен және техникалық сала мамандары. Ал биылғы түлектердің таңдауы медицина, инженерия, көлік және қызмет көрсету салаларына дейін кеңейіп отыр. Бұл – жастардың еңбек нарығына бейімделіп, сұранысқа сай шешім қабылдап жатқанын көрсетеді.
«Samruk Kazyna» ұсынған бағдарлама – жай грант емес, жастарға кәсіпке жол ашатын, өмірлік тәжірибе беретін әлеуметтік көпір. Өндіріс үшін теория мен тәжірибені қатар меңгерген маман – басты сұраныс. Бұл жоба сол қажеттілікті ішкі ресурспен шешіп, жастарды туған жерде қалуға ынталандырудың нақты үлгісіне айналды.
Кәсіпке бет бұрған 68 үміт
«Samruk-Kazyna Trust» қолдауымен жүзеге асып жатқан екі бағдарлама аясында бүгінде 277 бала біліммен қамтылып отыр. Оның 68-і – өз болашағын жұмысшы мамандықтарымен байланыстыруды таңдады.
Бұл – елдің өндірістік әлеуетіне қосылған 68 тірек, еңбек адамына деген шынайы құрметтің көрінісі.
Аталған жобалар – жаңа тамыр жайып келе жатқан бастамалар. Нақты нәтижелері уақыт өте айқын көрінері анық, өйткені білім мен кәсіби дағдыға салынған инвестиция – ең тұрақты әрі ұзақмерзімді қайтарым беретін капитал. Бүгін берілген бағыт пен мүмкіндік ертең тек бір отбасының емес, тұтас өңірдің әлеуметтік-экономикалық бейнесін өзгерте алады. Сондықтан бұл бастамалар – бір сәттік іс-шара емес, ел болашағына салынған сенімді негіз.
Айгерім АҚШОЛАҚОВА
