Айтулы жобаны елорда әкімдігі мен республикалық ғылыми-практикалық «Дарын» орталығы және «Астана дарыны» орталығымен бірлесіп, іске асырды. Осы орайда «Астана дарыны» орталығының директоры Жанар Бейсенбаеваның айтуынша, бұл жоба бас шаһардың брендіне айналып, әр елден келген жас роботтехниктердің өзара тәжірибе алмасатын алаң екенін атап өтті.
Бұл білім додасы мектеп оқушылары арасында роботтехника саласын жетік меңгерген үздіктерді анықтауға бағытталған. 2022 жылы қалалық деңгейде басталған турнир, қазір халықаралық деңгейге көтерілді. Алғаш рет чемпионатқа АҚШ, Болгария, Әзербайжан, Молдова, Өзбекстан, Қырғызстан, Тәжікстан елдерінен келген 25-тен аса шетелдік команда қатысқан еді. Бүгінде бірегей байқаудың танымалдылығы артып, аумағы кеңейген.
Осы орайда, WRO Әзербайжан бойынша ұлттық ұйымдастырушысы Кенан Каримов алдымен жоба жетекшілеріне ризашылығын білдірді.
«Біз Қазақ еліне келген күннен жылылықты сезіндік. Шын мәнінде, роботтехника — механизмдер туралы ғылым ғана емес. Бұл — жастар мен балалар үшін өте жақсы платформа. Себебі роботтехникамен айналысқанда сен жаңа достар табасың, солармен бірге жаңа идеялар іздейсің. Меніңше, жастардың бастамалары мен идеялары өз елдеріміз бен болашақ ұрпақтың дамуына үлес қосады деп сенемін», деді ол.
Жалпы алғанда, турниге 9-17 жас аралығындағы 350-ге тарта мектеп оқушысы 7 санат бойынша бақ сынады. Әр бағыттың өз ерекшелігі мен ережесі бар. Соны бұлжытпай орындағандар топ жарып, жүлделі орындарды иеленді.
Сонымен, чемпионаттың бас жүлдесі, яғни Қазақстан-Британ техникалық университетінің Ақпараттық технологиялар және инженерия мектебі грантын алматылық оқушылар Ернұр Ережеп пен Аслан Қабдуллов жеңіп алды. Ал жарысқа Абай облысы Үржар ауданынан келген Дмитрий Полежаев Алматы энергетика және байланыс университетінің болашақ студенті атанды. Ал «Үздік шетелдік команда» аталымы Өзбекстаннан келген жеткіншектерге бұйырды. Сондай-ақ турнирде ерекше көзге түскен оқушыларға да бағалы сыйлықтар мен дипломдар табыс етілді.
Фариза ІЗБАСАРОВА,
Л.Н.Гумилев атындағы Еуразия ұлттық университетінің студенті
