Ауқымды жобаны «Қазақстан» республикалық телерадиокорпорациясы ұйымдастырып келеді. Медиамектеп бағдарламасы еліміздің жоғары оқу орындарының журналистика, цифрлық медианы басқару, қоғаммен байланыс, медиаөнер, кино және телевизия режиссурасы, медиакоммуникация сынды мамандықтар бойынша білім алып жатқан студенттерге арналған. Биыл 104 өтінім түсіп, оның ішінде 48 қатысушы іріктеуден өтті. Сонымен қатар өңірлік жоғары оқу орындарынан қабылданған 23 студент білімді онлайн форматта алды.
– Биыл медиамектепте екі бірдей ерекшелік болды. Біз тұңғыш рет тек Астанадан ғана емес, аймақтардан да білім алушылар жинадық. 14 университетті қамти алдық. Екіншіден, біз тек қана корпорациямыздың ішіндегі мықты мамандарды ғана емес, сіздерге дәріс беру үшін сыртта, нарықта жұмыс істеп жүрген мықты медиамамандарды арнайы шақырдық. Олар нарықтық тәжірибелерімен бөлісе алды, – деді «Қазақстан» РТРК» АҚ басқарма төрағасы Ләззат Танысбай.
Медиамектепке іріктелген студенттер еліміздің жетекші оқу орындарының өкілдері. Олардың қатарында: Әл-Фараби атындағы Қазақ ұлттық университеті, Абылай хан атындағы Қазақ халықаралық қатынастар және әлем тілдері университеті, Т.Жүргенов атындағы Қазақ ұлттық өнер академиясы, Л.Н.Гумилев атындағы Еуразия ұлттық университеті, Назарбаев университеті, М.Әуезов атындағы Оңтүстік Қазақстан университеті, Қ.А.Ясауи атындағы Халықаралық қазақ-түрік университеті, Е.А.Бөкетов атындағы Қарағанды зерттеу университеті, С.Торайғыров атындағы Павлодар университеті және С.Аманжолов атындағы Шығыс Қазақстан университеті бар.
Айта кету керек, медиамектеп студенттері 7 ай бойы ақысыз негізде білім алды. Осы жылы оқуды аяқтаған студенттерді қоса алғанда, жалпы 129 түлек медиамектепті тәмамдаған. Олардың бірқатары қазір «Қазақстан» телерадиокорпорациясына қарасты телеарналарда қызмет атқарып жүр.
Ақерке ҚАБДҰЛКӘКІМ,
Л.Н.Гумилев атындағы Еуразия ұлттық университетінің студенті
