- Болгарияның Панагюриш қаласында үстел теннисінен WTT «Youth Contender» турнирі аяқталды. 13 жасқа дейінгі қыздар арасындағы сайыста Жәния Бекмұхамбетова бас жүлдені олжалады. Жарыс барысында жас спортшы болгариялық Радина Захариева, Мартина Николова, Белослава Балканская, словакиялық Вивьен Муркова, румыниялық Карисс Сербан мен Бьянка Томуды ұтты. Енді Жәниядан бөлек, Артём Ваплет, Дагир Данияров, Әмір Сарқытбай сынды жас өрендер Испанияның Пладжа-де-Аросында жалауы желбірейтін жарыста бақ сынайды.
- АҚШ-тың Лос-Анджелес қаласындағы «Industry Hills Expo Center»-де «International Taekwondo Fest 2025» деп аталатын халықаралық турнир аяқталды. Төрткүл дүниенің әр қиырынан жиналған 300-ден аса таеквондошы қатысқан жарыста Әділет Базарбаевтың бағы жанды. 63 кг салмақ дәрежесінде күш сынасқан ол Таха Хозема Хамбати, Стэнли Лопес, Алден Рю сынды шеберлерді айқын басымдықпен ұтып, бас жүлдені қанжығасына байлады.
- Ақтөбеде таеквондодан (WT) ел кубогінің бірінші кезеңі өз мәресіне жетті. Командалық есепте Алматы қаласы озып, 3 алтын, 2 күміс, 4 қоланы олжалады. Екінші, үшінші орындарды Атырау (2 алтын) мен Түркістан облысы (1 алтын, 2 күміс, 2 қола) иеленді.
- Туриндегі турнирде топ жарғаннан кейін еліміздің теннисшісі Александр Бублик АТР рейтингінде бірден 25 сатыға жоғарылап, 51-орынға табан тіреді. Александр Шевченко 97-орында. Ерлер арасында әлі де италиялық Янник Синнер көш бастап тұр. Екінші, үшінші орындарда – испаниялық Карлос Алькарас пен германиялық Александр Зверев. WTA рейтингінде беларусьтік Арина Соболенко алдына жан салар емес. Оны АҚШ-тың қос өкілі Кори Гауфф пен Джессика Пегула өкшелеп келеді. Еліміздің ең үздік ойыншысы Елена Рыбакина 12-орында, екінші ракетка Юлия Путинцева 32-сатыға жайғасты. Сондай-ақ Жапониядағы жеңісінен кейін Зарина Диастың да жағдайы біршама жақсарды. Жерлесіміз 43 сатыға жоғарылап, бұл күндері 275-орында тұр.
- Францияның Страсбургіндегі турнирді екінші кезеңнен бастаған еліміздің бірінші ракеткасы Елена Рыбакина қытайлық Ван Синьюйді 6:1, 6:3 есебімен ойсырата ұтты. Үшінші айналымда польшалық Магда Линетпен шеберлік байқасады. Жарыстың жүлде қоры 925 661 еуроны құрайды.
