134 жылдық тарихы бар Ролан Гарроста талай жақсылар мен жайсаңдар жасындай жарқылдағанын жанкүйерлер жақсы біледі. Ерлер арасында ең көп табысқа жеткен Рафаэль Надаль. Испанияның мақтанышы 2005–2022 жылдар аралығында 14 турнирде топ жарды. Дәл осы саңлақ атой салған кезеңде тек үш теннисшінің ғана оны тұғырдан тайдыруға шамасы жетті. Олар – швейцариялық Роджер Федерер мен Стэн Вавринка, сербиялық Новак Джокович. Федерер 2009 жылы, Вавринка 2015 жылы, Джокович 2016 мен 2021 жылдары бас жүлдені олжалады. Қалған жарыстардың барлығы Рафаэль Надальдің жарқын жеңісімен аяқталды.
ХХ ғасырдың басында кортта еркін ойқастаған франциялық Макс Декюжидің сегіз мәрте мерейі үстем болды. Жетпісінші жылдары Бьорн Боргтің басымдығы айқын байқалды. Швецияның марқасқасы алты турнирде топ жарды. Өткен ғасырдың алғашқы жартысында өнер көрсеткен Францияның ойыншысы Анри Коше байрақты бәсекенің бесеуінде қарсылас шақ келтірмеді.
Әйелдер арасындағы рекордтық көрсеткіш Крис Эвертке тиесілі. Америкалық ару 1974–1975, 1979–1980, 1983, 1985–1986 жылдары жеті жарыстың жеңімпазы атанды. Франциялық Сюзан Ленглен (1920–1923, 1925–1926) мен германиялық Штеффи Граф (1987–1988, 1993, 1995–1996, 1999) алты мәрте алдына жан салмады. Аустралиялық Маргарет Корттың (1962, 1964, 1969–1970, 1973) бес турнирде жұлдызы жанды.
Францияның бас шаһарында жыл сайын өтіп тұратын дәстүрлі турнирде талай таңдай қағарлық жайттар да орын алды. Мәселен, 2004 жылы жергілікті қос теннисші – Фабрис Санторо мен Арно Клеман арасындағы матч 6 сағат 33 минутқа созылды. 2010 жылғы финалда жапониялық Каруми Нараи румыниялық Моника Николескуден басым түсті. Бұл кездесу 4 сағат 42 минуттан кейін өз мәресіне жетті. 1988 жылы Германияның мықтысы Штеффи Граффқа КСРО-ның өкілі Наталья Звереваны еңсеруге небәрі 34 минут жеткілікті болды. Бұл бәсеке 6:0, 6:0 есебімен аяқталды.
Былтырғы Ролан Гарроста испаниялық Карлос Алькарасқа тең келер ешкім табылмады. Бастапқы бәсекелерде Флавио Коболли (Италия), Таро Даниэль (Жапония), Денис Шаповалов (Канада), Лоренцо Музеттиден (Италия) мерейі үстем болған испаниялық теннисші ширек финалда Стефанос Циципасты (Грекия), жартылай финалда даңқы жер жарған Новак Джоковичті жеңді. Финалда Каспер Рудты (Норвегия) қапы қалдырды.
Әйелдер сайысында Ига Свёнтек шашасына шаң жұқтырмады. Соның алдындағы екі турнирде де Польшаның өкілі ешкімге дес бермеген еді. Бұл жолы алғашқы айналымдарда Леолия Жанжан (Франция), Наоми Осака (Жапония), Мария Боузкова (Чехия), Анастасия Потаповадан (Ресей) айласын асырды. Ширек финалда Маркета Вондроушованы (Чехия) ұтты. Жартылай финалда Коко Гауффты (АҚШ) жолынан ығыстырса, финалда Жасмин Паолинидің (Италия) осал тұсын оңай тапты.
Былтырғы Ролан Гарроста еліміздің теннисшілері арасынан ең үздік нәтижеге Елена Рыбакина қол жеткізді. Әлемнің 12-ракеткасы ширек финалға дейін жетіп, сол межеде Жасмин Паолиниге жол берді. Оның алдында жерлесіміз Грет Миннен (Бельгия), Аранча Рус (Нидерланд), Элизе Мертенс (Бельгия), Элина Свитолина (Украина) сынды танымал теннисшілерді тізе бүктірген еді. Өкінішке қарай, өзге ойыншыларымыз сәтсіз өнер көрсетті. Юлия Путинцева екінші кезеңде Паула Бадосадан (Испания), Александр Шевченко Лорецо Музеттиден (Италия) жеңілді. Александр Бублик пен Тимофей Скатов алғашқы айналымнан аса алмады.
Париждегі турнирдің тарихында еліміздің екі теннисшісі ғана ширек финалға дейін жеткен. Олар – Ярослава Шведова мен Елена Рыбакина. Спорттық мансабын әлдеқашан аяқтаған Шведова 2010, 2012 жылдары, бүгінде өрелі өнерімен төрткүл дүние жанкүйерлерін тамсандырып жүрген Рыбакина 2021, 2024 жылдары сол межеден көрінді. Сәл ертеректе елімізде туып-өсіп, кейіннен Ресей азаматтығын алған Елена Лиховцеваның жартылай финалда ойнағаны да есімізде. Негізінен жекелеген сайысқа қарағанда жұптық бәсекедегі табысымыз қомақты. Мәселен, 2015 жылы аустралиялық Кейси Деллакквамен жұп құрған Ярослава Шведова, 2021 жылы Александр Бублик пен Андрей Голубев жұбы финалда ойнады.
