Сыр бойынан солтүстікке көш келеді

Халқы тығыз қоныстанған оңтүстік көші солтүстік жұрты үшін де сәтті бастама болыпты. Осының арқасында Павлодар өңірінде ғана 4 мектеп жабылудан аман қалған. Жаңа қонысқа үйреніскендер қазір қай салада да табысты жұмыс істеп келеді.

Шығыста да халқы азайған біраз елді мекеннің тұрғындары қатарын осы оңтүстік өңірден барғандар толтырып отыр. Шығыс Қазақстан облысының Еңбек мобильділігі орталығының директоры Арайлым Керімбекқызының айтуынша, еліміздің ішкі көші-қонын жүйелі жүргізіп, азаматтарға нақты қолдау көрсетудің нәтижесінде жыл басынан бері Қызылорда облысынан 3 отбасы қоныс аударып, тұрақты жұмысқа орналасыпты. Өңірде білім беру, денсаулық сақтау, ауыл шаруашылығы, өндіріс, қызмет көрсету салаларында бос жұмыс орындары жеткілікті.

Қоныс аударушыларды тұрғын үймен қамтамасыз ету, әлеуметтік төлемдер та­ғайындау, балаларын мектепке немесе балабақшаға орналастыру сияқты жан-жақ­ты қол­дау қарастырылған. Мемлекеттік қол­даудан бөлек, ауылға көшіп барғандар сондағы қариялардың «қорасы бос тұрмасын» деген қамқорлығын да сезі­неді. Екі сиыр, оншақты ұсақ мал беріп, оның жемшөбін, отынын түсі­ріп беретін жомарт азаматтар да бар.

Былтыр ғана Риддер қала­сының тұрғыны атан­ған Жанар Сыдықова Сыр­дария ауданындағы Ақ­жарма ауы­лының тумасы. Қ­азір Рид­дер қала­лық аза­мат­тық қорғаныс бөлімінде ма­мандығына сәйкес қыз­мет атқарады. Ол жаңа мекеніндегі табиғаттың сұлулылығына тәнті.

Ал Күршім ауданындағы Бірлік ауылына Арал қала­сынан көшіп барған Гү­лмира Тәзиева 7 баласымен «Бір қабатты Шығыс» бағ­дарламасы аясында бас­паналы болыпты. Үл­кен ұлы жұмысқа орналасып, кішілері мектепке қабыл­данған Гүлмира қа­ланы ауылға айырбастағанына еш өкінбейді.

Жанға да, малға да жайлы шығыста жұмысшысын үймен қамтып, 1 млн тең­геге дейін жалақы төлеу­ге даяр қожалықтар бар. Облыстағы жаңадан ашыл­ған 4 ауданға мемлекеттік қыз­меткерлер, ішкі істер сала­сының мамандары, мұ­ға­лімдер мен дәрігерлер жетіспейді. Жалпы, шығыстан келген делегация 1 960 бос жұмыс орнын ұсынып отыр.

Солтүстік Қазақстан облы­сының Еңбек мо­бильділігі орталығының басшысы Аман Төрегелдин Қызыл­орда өңі­ріне мемлекеттің жұмыс күшінің ұтқырлығын арттыру үшін азаматтардың ерікті түрде қоныс аударуына ықпал ететін бағдарлама­ны түсіндіру мақсатында арнайы келге­нін айтады. Облыс – ауыл шаруашы­лы­ғы мен өнеркәсіп саласы қатар дамы­ған өңір. Қызылорда облысымен ты­ғыз қарым-қатынаста жұмыс істеу­дің нәтижесінде бес жылда Сырдан облысқа 800-ге жуық адам қоныс ауда­рыпты.

«Олардың барлығы баспаналы болды, әлеуметтік жағынан жақсы қамтамасыз етілген. Бұл – бағдар­ламаның тиімділігін көрсететін нақ­ты мысалдардың бірі. Біз көшу­ге ниетті азаматтардың жаңа ортаға бе­йімделуіне кө­мектесеміз. Биыл 1 404 бос жұмыс орнын ұсынып отырмыз. Оның ішінде медицина, фармацев­тика саласында 98, білім беру сала­сында 197, ауыл шаруашылығында ­106, энергетика саласында 76, құры­лыс­та 57, өндірісте 129, біліктілікті қа­жет етпейтін 95, көлік, логистика сала­сында 79 бос жұмыс орны бар», дейді Аман Төрегелдин.

Павлодар облысының Еңбек мо­биль­ділігі орта­лы­ғының директоры Меруерт Есембаеваның айтуынша, биыл өңір 4 050 адамды қабыл­дауға дайын. 9 жыл ішін­де бұл өңірге сырттан бағ­дарлама аясында 20 мыңнан астам адам көшіп барыпты.

Ұлытау, Абай облыстарында да жұмыс күші тапшы. Осы өңірлерден келген өкілдер де «Болашаққа бағдар» бос жұмыс орындары жәрмеңкесінен қажетті маман табудан үмітті.

Облыстық жұмыспен қамтуды үйлестіру және әлеу­меттік бағдар­ла­малар бас­қармасының бөлім басшы­сы Нұржан Өмірзақовтың айтуын­ша, биыл солтүстікке көшуге 9 653 адам­ға өңірлік квота белгіленіпті.

Жалпы, жұмыс күші аз аймақтар­ға 2020 жылдан бері 708 отбасы қоныс аудар­ған. Бес жыл ішінде сол­түстік өңірлерге қоныс аударушылардың қатары 1,5 есе­ге артқан.

ҚЫЗЫЛОРДА