Аймақтар • 15 Мамыр, 2025

Биыл Жамбыл облысының диқандарына екі есе көп су берілген

70 рет

көрсетілді

2 мин

оқу үшін

Осы жылғы суару маусымы басталғалы жамбылдық шаруалар 44 млн текше метр су алған. Бұл туралы Су ресурстары және ирригация министрлігі хабарлады, деп жазады Egemen.kz.

Дана МЫРЗАҚАДІР

Биыл Жамбыл облысының диқандарына екі есе көп су берілген

Фото: gov.kz

Облыста күн райының ысуына байланысты суару кезеңі 25 күнге ерте басталған. Жауын-шашын болмағандықтан, суармалы суға сұраныс алдыңғы жылдармен салыстырғанда екі есе артып отыр. Бүгінге дейін өңірдегі 15 мың гектар егіс алқабы суарылған.

Қазіргі кезеңде Жамбыл облысының «Қазсушар» филиалы тиісті келісімшарттар жасалған шаруаларды суармалы сумен қамтамасыз етіп жатыр.

«Қазір барлық күш Жамбыл облысының шаруаларын суармалы сумен қамтамасыз етуге бағытталған. Ол үшін Киров су қоймасынан су жіберу көлемін ұлғайту бойынша қырғыз әріптестерімізбен келіссөз жүргізілді», деді Жамбыл облысының «Қазсушар» филиалының директоры Қайрат Аманов.

Өз кезегінде диқандар суға қатысты күрмеулі мәселе туындамағанын айтып отыр. «Пияз ектім, жақсы өсіп келеді. Тамшылатып суару жүйесі тиімді, суды, дәріні үнемдеуге көмектеседі. Енді гектарына 70-80 тонна өнім жинаймыз деп есептеп отырмыз. Шаруашылықпен айналысып жатырмын. Сумен мәселе жоқ», деді егінші Ақылбек Бәйтіков.

«13 гектарға арпа ектім. Қазір бір рет суарып қойдық. Су мол келіп жатыр. Тек келісімшартқа отырып, ақшасын төлеу қажет. Қазақта «судың да сұрауы бар» деген сөз бар. Біздің жер ылғалды жақсы ұстайды. Бір мәрте суарсақ, сол бізге жеткілікті. Оның өзінен жақсы өнім аламыз. Жоңышқаны да бір рет суарғаннан кейін, екі рет орып аламыз. Гектарына 150-170 орам шөп жиналады. Бұл өзіміз бағатын малға жетеді», деді Қызылшарық ауылының тұрғыны, шаруа қожалығының иесі Әбдібек Шымырбаев.