Сурет: vk.com/askerytarih
Пахалгам қаласында болған қарулы топтың қастандық әрекетінен 25 Үндістан азаматы мен бір Непал азаматы қаза тауып, көп адам жараланған. Осыдан соң Үндістан үкіметі Джамму мен Кашмирде жаппай тінту жүргізді. Үндістан құқық қорғау органдарының мәліметінше 1500-ден аса адам қамауға алынған.
Қазірде Пахалгам – халықаралық деңгейде даулы аумақ ретінде танылды, әлі де Үндістанның заңсыз оккупациясындағы Джамму және Кашмир аймағының бір бөлігі.
– Пәкістан шиеленістің артуын қаламайтынын атап өткім келеді. Бұл елдің саяси басшылығы тарапынан барлық деңгейде ашық мәлімделген. Сонымен қатар біз егемендігіміз бен аумақтық тұтастығымызды қорғауға дайынбыз. Егер Үндістан тарапынан агрессия болса, Пәкістан БҰҰ Жарғысында бекітілген өз-өзін қорғау құқығын толық пайдаланады, – деді Н.Бхатти.
Елшінің айтуынша, Пахалгамдағы оқиғадан кейін Пәкістан да мәлімдеме жасаған. Олар Үндістан басшылығы мен БАҚ өкілдері Пәкістанға қарсы жалған ақпарат таратып жатқанын айтады. Пахалгам сияқты оқиғаларды пайдаланып өздерінің ішкі саяси күн тәртібін ілгерілетіп, Үндістанның ішкі сәтсіздіктері мен Джамму және Кашмирдің заңсыз оккупациясындағы репрессивті саясатын жасыруға тырысады. Сонымен қатар Кашмир халқы мен үнді мұсылмандарына қарсы исламофобтық ұстанымдарды күшейтуге тырысып жатыр.
– Біз Пахалгамдағы оқиғаға Пәкістанды байланыстыруға бағытталған кез келген әрекетті жоққа шығарамыз. Пәкістан бұл іске қатысы жоқ және мұндай оқиғадан пайда көретін тарап емес. Өкінішке қарай, оқиғадан кейін бірнеше минут ішінде Үндістан Пәкістанды айыптай бастады, ешбір дәлелсіз, негізсіз айыптады. Бұл оқиғадан кейін Үндістан үкіметі әлі де ешқандай нақты дәлел ұсынған жоқ. Осыған орай Үндістанның өз ішінде де, халықаралық қауымдастық тарапынан да сұрақтар туындап отыр, – деді елші.
Сондай-ақ ол Үндістан 1960 жылы жасалған Инд өзені туралы келісімді бұзып отырғанын айтады. Бұл келісімнің заңды күші бар, өйткені Дүниежүзілік банктің қатысуымен жасалған. Келісім сонымен қатар Пәкістанның үш батыс өзенінің құқықтарына кепіл бола алады.
– Бұл өзендердің суын елдің 240 миллионнан астам тұрғыны пайдаланып отыр. Аталған келісімді тоқтату – біржақты және заңсыз әрекет. Келісімде мұндай мәселе қарастырылмаған. Үндістанның осы заңсыз әрекеті өңірлік бейбітшілік пен тұрақтылыққа қауіп төндіріп, апатты жағдайға әкелуі мүмкін. Пәкістанның Ұлттық қауіпсіздік кеңесі келісім бойынша Пәкістанға тиесілі судың ағынын тоқтату немесе бұру әрекетін қақтығыс актісі ретінде қабылдайтынын және оған жауап берілетінін нақты мәлімдеді. Пәкістан барлық көршімен бейбіт және тату көршілік қарым-қатынас орнатуға ұмтылады. Біз өзара құрметке, егемендік теңдігіне, бейбіт өмір сүруге және шешілмеген дауларды бейбіт жолмен шешуге негізделген қатынастарды қалаймыз, – деп жеткізді Пәкістан билігінің ұстанымын Н.Бхатти.
Қазір Үндістан мен Пәкістан оқ атуды тоқтатуға ресми түрде келіскендерін мәлімдеді. Үндістан Сыртқы істер министрі Викрам Мисри екі елдің әскери құрылымдары арасында келіссөздер өткенін хабарлады. Ал Пәкістан премьер-министрі Шахбаз Шариф АҚШ президенті Дональд Трампқа бейбіт келісімге қол жеткізудегі белсенділігі үшін алғыс білдірді.
«АҚШ-тың делдалдығымен өткен ұзақ келіссөз түнінен кейін мен Үндістан мен Пәкістанның атысты толық және дереу тоқтату жөнінде келіскенін қуана хабарлаймын», деп жазды Д.Трамп «TruthSocial» әлеуметтік желісіндегі парақшасында.
Алайда келісімнің нақты шарттары әлі жарияланған жоқ.
