Төрт жыл ішінде осы бағдарлама арқасында өңірде дәрігерлер көмегімен аман-есен дүниеге келген 412 сәби өз шаңырақтарын қуанышқа бөлесе, қазіргі уақытта 57 әйел квота көмегімен ем қабылдап, сәби күтіп жүр. Облыстық денсаулық сақтау басқармасының дерегіне қарағанда, 2021–2024 жылдар аралығында Ақтөбе облысында бедеулікпен бетпе-бет келген 1 365 жұп квота алса, биылғы жылдың соңына дейін 170 ерлі-зайыпты осындай мүмкіндікке қол жеткізбекші.
Бала дүниеге келгенше қаншама сергелдеңді бастан кешірген ерлі-зайыптылардың төзімі мен сабырын тауысатын жауапты да сауапты істің басы-қасында жүрген дәрігерлердің қызметі ерекше. Ата-ана болуға асыққан ерлі-зайыптыларды психологиялық жағынан дайындайтын да осы саланың мамандары. Бұл сәбилі болуға асыққан ер мен әйелдің денсаулығын қалыпқа келтіруден бастап, сәбидің құрсақтағы дамуы мен өмір есігін ашқанға дейінгі кезеңдерін қамтитын өте нәзік әрі күрделі құбылыс. Бағдарлама перзент сүюді ұзақ уақыт армандаған қаншама отбасының шаңырағын бекітіп қана қоймай, елдегі демографиялық ахуалды жақсартуға да септігін тигізіп отыр.
Ақтөбе облысы
