Велосипедшілерді жол полициясы бастап жүрді. Сонымен бірге жедел жәрдем қызметі спортшылардың денсаулығын бақылап отырды. Веломарафонның ашылуына арнайы қатысқан «Атамекен» ұлттық кәсіпкерлер палатасының төралқа төрағасы, еліміздің велоспорт федерациясының президенті Райымбек Баталов келесі жылдан бастап жарыс халықаралық деңгейде өтетінін мәлімдеді.
«Шымкент–Ташкент веломарафоны мегаполистің жыл сайын өтетін дәстүрлі спорттық іс-шарасына айналды. Жарысты ұйымдастыруға қолдау көрсеткен қала әкімдігіне, велоспорт федерациясына, демеушілерге айтар алғысым шексіз. Веложарыс тек спорт емес, спорттық мәдениет, саламатты өмір салты. Осы спорт түрін өркендетіп, насихаттау арқылы халықтың денсаулығын нығайтамыз, жастардың вело- спортқа қызығушылығын арттырамыз. Бүгінгі жарыстан түскен қаражаттың бір бөлігі қайырымдылық ретінде балалар үйіне аударылады», деді Р.Баталов.
Қала әкімінің орынбасары Сәрсен Құранбек те бүгінде мемлекет тарапынан спортты дамытуға барынша қолдау көрсетіліп жатқанын атап өтті.
«Соның нәтижесінде халықаралық деңгейдегі түрлі жарыстарда шымкенттік өрендер жүлделі орындардан көрініп жүр. Олимпия ойындарына қатысатын ұлттық құрама сапында да мегаполис спортшылары жетерлік. Жалпы, Шымкентте әртүрлі дәрежедегі спорттық бәйгелер жүйелі түрде ұйымдастырылып тұрады. Шаһарда көптеген спорттық үйірме ашылған. Онда жүздеген бала сабақтан тыс уақытта спортпен шұғылданып, болашақ чемпион болуға талпынады. Мұның бәрі мегаполистің спорттық әлеуетінің жоғары екенін байқатады», деді С.Құранбек.
Іссапар барысында Р.Баталов еліміздің жеңіл атлетика федерациясының вице-президенті Ольга Рыпаковамен бірге қала әкімі Ғабит Сыздықбековпен кездесіп, мегаполисте велоспорт пен жеңіл атлетика спортын дамыту жөнінде кеңесті. Сондай-ақ әлемдік «Gran Fondo» шосселік велосайысын Шымкент қаласында өткізу мүмкіндігін саралады. Бұл жарысқа шаһардың инфрақұрылымы толық сәйкес келеді. Шымкент – халықаралық сайыстарды ұйымдастыруда тәжірибесі бар қала. Соның бір айғағы – былтыр өткен әлемдік шахмат сайысы. Сол секілді халықаралық марафон мен веложарыстарды Шымкентте ұйымдастыруға да толық мүмкіндік бар.
ШЫМКЕНТ
