Мәдени шараның мақсаты – жас буынға елімізтарихындағы айшықты оқиғалардың маңызын ашып көрсету және ұлттық рухани құндылықтарымыз бен мәдени мұрамызды насихаттауға, көрнекті тарихи тұлғалардың жасампаз істерін өскелең ұрпақ бойында сіңіру екен.
Жиынды ашып көпшілікке бас қосудың маңызы хақында түсінік берген Президенттік орталығы директорының орынбасары Ботагөз Қайыпова: «Біз Отан қорғаушылар күніне және Ұлы Жеңістің 80 жылдығына арналған салтанатты шараға жиналып отырмыз. Сонымен қатар Қосшы ауылының тумасы Рахымжан Қошқарбаевтың Рейхстагқа Жеңіс туын тіккеніне тура 80 жыл толып отыр. Батыр атамыздың ерлігін ұмытпай жадымызда сақтау – біздің парызымыз» деп, шараға жиналған қауымды арнайы дайындалған көрмені тамашалауға шақырды.
Көрме сөресінен Ұлы Отан соғысы жылдарында ел қорғаған жауынгерлердің ерлік істерін көрсететін 100-ге жуық жәдігер орын алыпты. Атап айтқанда, Кеңес Одағының Батыры, Халық қаһарманы, тәуелсіз Қазақстанның тұңғыш Қорғаныс министрі, армия генералы С. Нұрмағамбетовтің өнегелі өмір жолы туралы мәліметтер, соғыс ардагері Ақбек Ідірісұлыныңфотосуреттері, наградалары мен құжаттары, хаттары, жеке заттары және Қазақстан Республикасы Қарулы Күштерінің қалыптасу тарихына қатысты деректі құжаттар т.б.
Сонымен қатар, кент тұрғындары мен қонақтар биыл туғанына 115 жыл толып отырған атақты қаһарман атамыз Бауыржан Момышұлы, туғаны 110 жыл толып отырған Кеңес Одағының Батыры Мәлік Ғабдулин, туғаны 100 жыл толып отырған қазақтың батыр қызы Әлия Молдағұлова қатарлы тұлғалардың өмір жолын насихаттауға арналған «Ерлік дастаны» атты көшпелі көрмені тамашалады.
