Үш аулада да балалар ойын алаңдары жаңарып, дене шынықтыруға таптырмайтын workout орындары сайланды. Тұрғындардың демалуына жайлы аймақтардың ажары кіріп, аулалар түгел жарықтандырылды. «Байқоңыр» ауданында барлығы 249 аула бар болса, былтыр осының ішінде 132 ауланың аумағы абаттандырылыпты. Оның 60-ы кешенді абаттандыру болса, 72-сі жөндеу-қалпына келтіру жұмыстары екен. Аудан әкімдігі әр ауланы абаттандыруға кіріспес бұрын тұрғын үйдің аумағын, ересектердің, балалардың үлесін бәрін-бәрін нақтылап алған. Сосын барып тұрғындардың өтініші, ұсынысы негізінде керек-жарағын түгендеген. Яғни аула тұрғындары айтқан ойын алаңшаларын, дене шынықтыруға қолайлы жабдықтарды орнатып берген.
Біз мереке қарсаңында салтанатты түрде ашылып, пайдалануға берілген Республика даңғылы №30 үйдің ауласына бардық. Үй тұрғындары, ойын балалары аулаға шығып, шат-шадыман көңіл-күйде. Немере-шөберелерін ертіп жүрген Гүлбаршын Оразбаева көптен күткен ауланың қайта жаңғырғанына дән риза.
– Осы үйдің бірінші подъезі-нен үй сатып алғанымызға 4 жылдан асып барады. Сол жылдары үйдің ауласы, кіреберісі, шатыры бәрі-бәрі ескі еді. Енді, міне, пәтер иелері кооперативінің төрағасы Диана бастап, үйдің жыртығын жамап-жасқап жатырмыз. Жертөледен бастап үйдің шатырына дейін жөндеп алдық. Ауламыз адам көргісіз еді. Оны да бірер аптаның ішінде жөндеп берді. Енді немере-шөберелеріміз келсе, өзге аулаға сенделмей, осында қарап отыратын болдық. Өзімнің 11 шөберем бар. Ауламыз біз секілді қариялардың да аз-кем тынығып алғанына жайлы екен, – дейді Гүлбаршын әжей.
Аула маңында тұрғындардың басын қосып, Республика даңғылы №30 үйдің төңірегін жаңартуға бастамашы болып жүрген пәтер иелері кооперативінің төрағасы Диана Ыдырысованың өзін жолықтырдық.
– Бүгін аула тұрғындары үшін айтулы күн. Өйткені көптен күткен балаларға арналған ойын алаңшасы ашылып жатыр. Енді ауламыз қауіпсіз әрі балаларға да ересектерге де жайлы орынға айналды. Былтыр «Байқоңыр» ауданының әкімдігіне тозығы жеткен ауламызды абаттандыру туралы өтініш қалдырған едік. Көп ұзамай әкімдік біздің ауланы да жоспарға енгізді. Осы үйдің тұрғыны ретінде өтінішімізге назар аударған аудан әкімдігіне алғыс айтқым келеді. Бірлесіп іске асырған жұмыстың арқасында үйдің ауласы жаңарып қалды,– дейді үй тұрғыны Диана.
Аудан әкімдігінің хабарлауынша, абаттандыру жұмыстары ауданның басқа да аумақтарында қызу жүріп жатыр. Биыл ауданда бас-аяғы 88 ауланың аумағын абаттандыру жоспарланыпты. Оның 18-і кешенді абаттандырылса, 70-інде жөндеу-қалпына келтіру жұмыстары басталады екен. Бұл жөнінде «Байқоңыр» ауданы әкімдігінің абаттандыру бөлімінің басшысы Рахат Дулатұлынан толғырақ сұрап-білуге тырыстық.
– Биыл «Байқоңыр» ауданында 88 ауланы абаттандырамыз деп жоспарладық. Оның ішінде 18 аула толығымен жаңарады. Яғни күрделі жөндеуден өтеді. Қалған 70 ауланы толық жаңартпасақ та, ішінара жоғын түгендейміз. Мереке қарсаңында Республика даңғылынан бөлек, Абай көшесі №28, №30 үйлердің де ауласы қайта ашылып жатыр. Республика даңғылы №30 үйдің ауласы жөндеуден өтпегеніне 10 жылдан асыпты. Ескінің барлығын жаңарттық. Ересектердің де спортпен шұғылдануына мүмкіндік жасадық. Асфальтты қайта төседік. Осының барлығын жұмысшылар 20 күнде тындырды. Былтыр осы үйдің маңындағы №28-үйдің де ауласын жаңартқан едік. Сонда көрші үйдің тұрғындары да ауласын абаттандыруға өтініш қалдырған. Енді биыл сол тұрғындардың да өтініші орындалып отыр, – дейді Р.Дулатұлы.
Осы күні ауланың ашылу салтанатына қатысқан «Байқоңыр» ауданының әкімі Талғат Рахманберді тұрғындардың алғысын естіп, талап-тілегін тыңдады. Балалар аудан әкімдігі ұйымдастырған ойын-сауық бағдарламаға қатысса, тұрғындар аулаға өздері шағын дастарқан жайып, балаларды тағы бір қуантты.
