Ауылдағы мәдениет ошағын адам айтқысыз түлетіп, заманауи үлгідегі ағартушы алаңға айналдыратын жоба «Қазақстан халқына» және «Tana» қоғамдық қорларының есебінен қолға алынған еді.
Кейінгі кезде елімізде әдебиеттің мәртебесі көтеріліп, кітап оқу мәдениеті қалыптасып келе жатқандай әсер қалдыратынын айтқан едік. Бұл үрдіс төменнен де, жоғарыдан да байқалады. Президент Қасым-Жомарт Тоқаевтың тапсырмасымен елімізде 23 сәуір – Ұлттық кітап күні болып белгіленуі де жақсы нышан. Аталған мереке оқырман мәдениетін дамытуға және жастардың кітапқа деген сүйіспеншілігін арттыруға бағытталған маңызды қадам екені сөзсіз.
Бұдан бұрын газетімізде Бәйтерек ауданындағы оқырмандардың қуанышы туралы жазған едік. Жақында осындай қос қуаныш Ақжайық және Қазталов аудандарында болды. Өңірдің мәдени өміріндегі маңызды оқиғаға Батыс Қазақстан облысы әкімінің орынбасары Бақытжан Нарымбетов, «Қазақстан халқына» қорының төрайымы Ләззат Чинкисбаева, «Қазақстан халқына» қорының орынбасары София Айсағалиева және «Тana» қорының негізін қалаушы Кәмила Лұқпанова, inDrive халықаралық сервисінің негізін қалаушы және бас директоры Арсен Томский қатысты.
Ауыл кітапханаларының базасында ашылған қос «Jaña Klub» комьюнити-орталығы енді ауыл тұрғындарына сан-салалы қызмет көрсетеді. Бұл жерде келуші кітап оқып қана қоймай, жаңа білім игеріп, мәдени іс-шараларға қатыса алады.
Бақытжан Нарымбетовтің айтуынша, өңірде 2025 жылдың соңына дейін 9 мың шаршы метр кітапхана кеңістігі қайта жаңғыртылып, 100-ден астам кітапханашы қайта даярлықтан өтеді екен. Ал жаңадан ашылған комьюнити-орталықтар 130 мыңнан астам адамды қамти отырып, тұрғындардың білім беру ресурстарын, шеберлік сабақтарын пайдалануына және мәдени іс-шараларға қатысуына мүмкіндік береді.
Елімізде Президент тапсырмасымен биыл сәуір айында тұңғыш рет Кітап күні аталып өтеді. Бұл кітапханалардың ел өмірінде өсіп келе жатқан рөлін көрсетеді. Ал Батыс Қазақстан облысы әкімдігі мен «Tana» қоры жүзеге асырып жатқан комьюнити-орталықтар барлық жастағы ауыл тұрғыны үшін пайдалы. Мұнда мектеп оқушылары да, студенттер де, жергілікті белсенділер де, аға буын өкілдері мен қоғам мүшелері де уақытын тиімді әрі пайдалы өткізе алады.
Жаңартылған кітапханалардың ерекшелігі көп. Мысалы, 725 шаршы метрді алып жатқан Ақжайық ауданындағы комьюнити-орталық келушілерге бірнеше бағытта бұрыш ұсынады: дәстүрлі музыка әуесқойлары үшін «Домбыра» және «Ән-күй» аймағы бар. Ал қолөнермен айналысатындар үшін «Тігін» аймағы, отбасылық демалыс үшін жайлы «Ана мен бала» аймағы әзір. Сондай-ақ мұнда қауіпсіз интернет және заманауи web-55 жүйесі қарастырылған. Бұл кітапхананы тек оқу орны ғана емес, білім алатын және шығармашылық кездесулер ұйымдастыратын ыңғайлы алаңға айналдырады.
Ақжайықтан кем түспейтін тағы бір қызықты комьюнити-орталық Қазталов аудандық кітапханасында да ашылды. Жалпы, көлемі 662 шаршы метрді қамтитын бұл кеңістікте әдеби шығармалар талқыланатын «Сана» оқырман клубы, қолданбалы өнерге қызығатындар үшін «Шебер қолдар» клубы, суретшілер өз тәжірибесімен бөлісіп, шабыт алатын «Мозаика» шығармашылық бірлестігі жұмыс істейді.
– Қазталов және Ақжайық аудандарында заманауи кітапханалардың ашылуы – өңіріміздің мәдени және білім беру инфрақұрылымын дамытудағы маңызды қадам. Ауылда тұрғындар үшін жаңадан білім, шығармашылық және қарым-қатынас орталығы пайда болды. Мұндай бастамалар жерлестеріміздің әлеуетін ашуға, кітап оқуға деген сүйіспеншілікті арттыруға және өзін-өзі дамытуға жаңа мүмкіндік ашады деп сенеміз, – деді өз сөзінде облыс әкімінің орынбасары Бақытжан Хаберұлы.
Жоба «Қазақстан халқына» қорының қайырымдылық бастамасы аясында, Батыс Қазақстан облысы әкімдігінің қолдауымен жүзеге асырылып жатқанын айттық қой.
«Біз елімізде алғаш рет аталып өтетін Ұлттық кітап күні қарсаңында маңызды оқиғаның ортасында болып, кітапханаларды жаңғыртуға үлес қосып жатқанымызға қуаныштымыз. Заманауи кітапхана – білім жанданып, талант ашылып, мәдени дәстүр нығая түсетін мүмкіндіктер орталығы. Мұнда келген әр адам – мейлі бала, мейлі ересек болсын – әлемдік білім ресурстарына қосылып, шығармашылығын шыңдап, еркін қарым-қатынас жасай алады. Бұл – болашаққа жасалған инвестиция. Біз осы бастама арқылы серіктестерімізбен бірге өңір тұрғындарына әлемдік мәдениет пен білімнің есігін ашып бердік», дейді «Қазақстан халқына» қорының төрайымы Ләззат Чинкисбаева.
Қор жетекшісінің айтуынша, «Қазақстан халқына» қоры 25 кітапхананы заманауи жабдықтармен қамтамасыз ету және кітап қорын жаңарту үшін 797 млн теңге бөлген екен. Ал Батыс Қазақстан облысы әкімдігі кітапхана ғимараттарын жөндеу мақсатында 197,8 млн теңге қаржы салған. «Tana» қоры жобалық басқаруды ұйымдастыруға 53,5 млн теңге бағыттаса, қызметкерлерді оқытуды қамтамасыз ететін «Жас көшбасшылар қауымдастығы» қоғамдық бірлестігі 22,67 млн теңге бөліп отыр. Сонда жобаның жалпы бюджеті – 1 070 936 284 теңгені құрайды.
Ауыл кітапханаларының жаңғыруына Қазақстандағы білім беру және мәдени инфрақұрылымды дамытуға белсенді қатысып отырған «Tana» қорының көмегімен инновациялық білім беру бағдарламалары, интерактивті аймақтар және технологиялық шешімдер енгізілетін болады. Ал бұл халық арасында кітап оқу мәдениетін дамытуға ықпал етпек.
«Біз кітапхана ғимараттарының көз тарта жөнделуімен қатар, білім алу, шығармашылықпен айналысу және қарым-қатынас жасауға арналған заманауи орталықтарға айналуына күш саламыз. Мұндай комьюнити-орталықтар оқу мәдениетін нығайтуға көмектеседі және жергілікті халықтың өмірін оң өзгеріске әкеледі деп сенеміз», дейді «Tana» қорының негізін қалаушы Кәмила Лұқпанова.
Жоба аясында кітапхана қорларын толықтыруға 68 миллион теңгеден астам қаржы бөлінген. Қорға 800-ден астам жаңа кітап қосылады, оның ішінде қазақстандық және шетелдік авторлардың еңбектері бар. Сонымен қатар кітапханалар заманауи музыкалық аспаптармен, үстел ойындарымен, тігін және қолөнер жабдықтарымен қамтамасыз етіледі. Жаңа комьюнити-орталықтар белсенді демалысқа, кездесулерге және білім беру бастамаларына жағдай жасайды.
Өңірдегі кітапханаларды жаңғырту қазірдің өзінде тиімділігін көрсетіп жатыр. Мұны жаңартылған комьюнити-орталықтарға келушілердің саны артқанынан-ақ байқауға болады. Сондай-ақ мәдени және білім беру бағдарламалары жергілікті халықтың ерекше қызығушылығын тудырды. Кеше ғана ашылған Қазталов және Ақжайық аудандарындағы кітапханалар да кітап оқумен қатар, өзін-өзі дамыту, шығармашылық және қарым-қатынас мүмкіндігін ұсынатын танымал қоғамдық комьюнити-орталыққа айналары кәміл.
Қазталов ауданында қайта жаңғыртылған кітапханадан бөлек, Қазталов мектеп-лицейі де 250 млн теңге қаражатқа жабдықталды. Бұл – Мемлекет басшысының тапсырмаларының ауылдық жерде жүзеге асырылуының айқын көрінісі.
– Кітапханаларымыздың заманауи үлгіде жабдықталуы оқырманның қызығушылығын арттырып, кітап оқу мәдениетінің қалыптасуына зор септігін тигізеді деп ойлаймын. Президент идеясын жүзеге асыру мақсатында «Tana» қоғамдық ұйымының бастамасымен, «Qazaqstan halqyna» қоғамдық әлеуметтік қорының қолдауымен БҚО-дағы кітапханаларды жаңғыртып жатырмыз. Ауылдағы ағайын да жанға жайлы рухани орталықта көкжиегін кеңейтеді деген сенімдемін, — деген еді Қазталов ауданында халықпен кездескен сәтінде Ләззат Чинкисбаева.
– Жобаны іске асырудың бірінші кезеңінде біздің мектептің материалдық-техникалық базасы жаңартылып, заманауи пәндік және цифрлы кабинеттермен жабдықталды. Жылдамдығы жоғары интернетпен қамтамасыз ету мәселесі де оң шешімін тапты. Жобаға қатысушы мектеп педагогтері цифрлық құзыреттілікті арттыру және кәсіби дамытуға бағытталған арнайы курстардан өтіп жатыр. Орал қаласындағы физика-математика бағытындағы Назарбаев зияткерлік мектебімен, Орал қаласы филиалының Педагогикалық шеберлік орталығымен әріптестік орнады, – дейді Қазталов мектеп-лицейі директорының оқу ісі жөніндегі орынбасары Әлия Балдахова.
Мектепте «Қазақстан халқына» қорының қолдауымен мектепалды даярлық, бастауыш сыныптар, ағылшын тілі, қазақ тілі мен әдебиеті, тарих, физика, математика, биология, химия, география информатика, алғашқы әскери дайындық, технология және спорт зал, акт зал кабинеттері толығымен жабдықталса, жаңадан ерекше білім беруді қажет ететін балалармен жұмыс жасауға арналған арнайы кабинеттер, «Шаштараз», «Audio студия», «Лингофон», «Мүсіндеу», «Art студия», «STEM», «Телестудия», «Гидропоника» сияқты кабинеттері ашылған.
Батыс Қазақстан облысы
