- Халықаралық конькишілер одағы (ISU) мәнерлеп сырғанаудан 2027 жылғы әлем чемпионаты Финляндияның Тампере қаласында өтетінін ресми түрде растады. Жарыс жалауы 15-21 наурыз аралығында желбірейді. Биылғы Гран-при додаларын мына мемлекеттер қабылдайды: Франция (17–19 қазан), Қытай (24–26 қазан), Канада (31 қазан – 2 қараша), Жапония (7–9 қараша), АҚШ (14–16 қараша), Финляндия (21–23 қараша). Финалдық сайыс 4–7 желтоқсан аралығында Жапонияның Нагоя қаласында ұйымдастырылады.
- Таеквондодан Сербияның астанасы – Белградта өткен Serbia Open G1 халықаралық турнирінде еліміздің құрамасы мол олжаға кенелді. Кадеттер екі алтын, бір күміс, үш қола медальды иеленсе, жасөспірімдер төрт алтын, бір қоланы еншіледі. Нәтижесінде, жалпы есепте жерлестеріміз бірінші орынға ие болды. Жекелеген таеквондошылар арасынан Хамзальпер Ромашкин, Диас Байдоллаев, Теміржан Тасқын, Нұрперзент Саматұлы, Қанат Рахымберді, Егор Шаптефраць қарсылас шақ келтірмей, бас жүлдені олжалады.
- 11–13 сәуір аралығында Францияның Мец қаласында үстел теннисінен WTT Youth Star Contender Metz халықаралық турнирі өтеді. 19 жасқа дейінгі (U19) спортшылар арасындағы жарыста қарағандылық Алан Құрманғалиев те өнер көрсетеді. Қазақ спортшысы жекелеген сында және ұлыбританиялық Коннор Гринмен бірге жұптық бәсекеде бақ сынайды.
- Футболдан УЕФА Чемпиондар лигасының ширек финалының алғашқы кездесулері өтті. Бәсекелердің үшеуінде алаң иелері жеңіс тойын тойлады. Лондонның «Арсеналы» Мадридтің «Реалының» қақпасына жауапсыз үш гол соқты – 3:0. «Барселона» Дортмундтан келген «Боруссияның» тас-талқанын шығарды – 4:0. Париждің ПСЖ-сы «Астон Вилланы» еш қиналмай ұтты – 3:1. Мюнхеннің «Бавариясы» өз алаңында «Интерге» есе жіберді. Қарымта матчтар 16–17 сәуір күндері өтеді.
