Суреттерді түсірген – Гүлнар МАХАН
Бұл бастама академик Евней Бөкетовтің 100 жылдық мерейтойына «100 игі іс» жобасы аясында жүзеге асырылып отыр. Сонымен заманауи кітапхананың салтанатты ашылу рәсімін Едіге Мұхтарұлы, профессорлар Бейсембай Ерғалиұлы, Жандос Қожахметұлы жасап, құттықтау лебізін білдірді.
Едіге Мұхтарұлы университеттің жаңа кітапханасына классик жазушы Мұхтар Мағауиннің 26 томдық толық жинағын, «Қасым» кітап үйі шығарған бірнеше кітапты сыйға тартты.
– Кітапхана заман талабына сай құрылыпты. Тәнті болдық. Алдағы уақытта жастардың ілім-білімін шыңдауға қызмет ете берсін. Байқағаным, Қарағандыға еліміздің басқа да облыстарынан жастар келіп білім алады екен. Бөкетов университеті – еліміздегі жетекші оқу орындарының бірі. Әкемнің бұл университетке, Евней Арыстанұлына құрметі бөлек еді. Егер әкемнің жас кезінде тәулік бойы жұмыс істейтін осындай кітапхана болса, онда қона жатар еді, – деді Едіге Мұхтарұлы.
Күні-түні оқырманына ашық кітапханадан студенттер мен оқытушылар ізденісті үдетіп, ғылымға ден қоюға мүмкіндік алады.
– Негізгі мақсат – жас буынға терең білім беру. «Аса мәртебелі студент» дегенді жиі айтамыз. Барлық игілік студенттер үшін жасала береді де. Мәселен, Жапония, Америка сынды дамыған елдерде кітапхананың 24 сағат жұмыс істейтінін көрдім. Ал бізде 18:00-де жабылып қалады. Кейінгі кезде «жастарға дұрыс жағдай жасамай жүрміз бе?» деген ой мазалай берді. Неге мүмкіндік тудырмасқа? Міне, бұған да жеттік. Бұл кітапхана тәулік бойы жұмыс істейді. Алдағы уақытта барлық факультеттің кітапханаларын жаңғырту жоспарда бар, – деді университет ректоры Нұрлан Дулатбеков.
Ректор Нұрлан Орынбасарұлы Едіге Мұхтарұлына университет атынан естелік сыйлық табыстап, разылығын білдірді. Сонымен қоса кітапханаға жазушы Кемел Тоқаевтың еңбектерін тарту етті. Факультет ұжымы Едіге Мағауинге «Тереңге тартқан тамырын» атты биографиялық кітап сыйлады.
Жаңа кітапхананың цифрлық жүйеге негізделуі білім алушылардың уақытын үнемдеп, ізденісін жеңілдетуге зор мүмкіндік береді. ID карталар арқылы қажетті кітапты өз бетінше тауып, қолдану – уақыт талабына сай жасалған тиімді шешім.
– Кітапхана бір мезетте 100 адамға дейін қабылдап, сапалы қызмет көрсете алады. Қорында 200 мыңнан астам кітап бар. Негізгі залға Евней Арыстанұлы мен оқу ордасының өсіп-өркендеуіне үлес қосқан ғалымдардың портреттерін ілдік. Жоба бұған дейін университеттің 13 факультетінің үшеуінде жүзеге асырылған. Бұл – төртіншісі. Әрқайсысы бір-біріне ұқсамайтын стильде. Филология және философия факультетінде орналасқандықтан, этно-стиль таңдалды. Келесі кітапхана шет тілдері факультетінде жабдықталмақ, – дейді университеттің ғылыми кітапхана директоры Гауһар Қуанышқызы.
Кітапхана сегіз бөліктен тұрады. Конференция залы, жеке жұмыс, сирек қор, мультимедиялық ресурстар, этноаймақ, абонемент, кітап қоры және оқу залы. Әсіресе Wi-Fi желісімен қамтылып, цифрлық жүйенің енгізілуі білім алушыларға таптырмас көмек. Ғылыммен айналысатын жандарға арналған сирек кітаптар қорында екі мыңға жуық кітап бар.
Белгілі кәсіпкер, атымтай азамат Ерлан Әшім «Қасым» кітап үйі басып шығарған кітаптарды жаңа кітапхана қорына сыйлады.
Сондай-ақ университетте «Алаш» коворкинг-орталығы ашылды. Жаңа орталықта ыңғайлы жұмыс аймағы, тегін Wi-Fi және дәмді кофехана қарастырылған. Мұнда студенттер оқу кездесуін өткізеді. Жобалармен жұмыс істейді әрі үзіліс кезінде демалу үшін таптырмас орын.
Қарағанды облысы
