Көшпелі білім көрмесі

Ақтөбе қаласында өт­кен көрмеге қатысушы­лар жетекші отандық уни­верситеттер мен шетелдік жоға­ры оқу орындарының елі­міз­дегі филиалдарының өкіл­дерімен бетпе-бет тілдесіп, оқу­ға түсу шарт­тары, білім бағдарламала­ры, 2025 жылғы ҰБТ ерекшелік­тері, мемлекеттік грант­тар туралы жан-жақты ақпа­рат алды. Көр­ме аясында оқу­шылар Ғылым және жоғары білім министрі­нің кеңесшісі Рус­лан Емелбаев­пен, Ғылым және жоғары білім ми­нистрлігінің Жоғары және жо­ғары оқу орнынан кейінгі білім комитеті төр­ағасының орынбасары Ақерке Абылайханмен, MDSG жобасының батыс аймағындағы жоба жетекшісі Еркін Есер­ке­повпен кездесіп, кәсіби бағыт-бағдар алуға мүмкіндік алды. Мамандар оқушыларға мамандық таңдау мен болашақ білім жолын жоспарлау жөнінде құнды кеңестер берді.

Көрме одан кейін Атырау қала­сында жалғасты. Бұл жолы Х.Досмұхамедов атындағы Аты­­рау университетінде ұйым­дас­тырылған іс-шараға алғаш­қы күні мыңнан астам оқушы мен ата-ана келіп, университет өкілдерімен жүздесті. «Атыраумен көршілес жатқан Ақтөбеде биыл екінші ­жыл қатарынан британдық Хериот-Уотт университеті 400-ге жуық студентке білім беріп жатыр. Осындай 20-дан астам шетел­дік оқу орнының филиалдары және еліміздегі университеттер­дің өкілдері Атырауға келіп отыр. Басты мақсат – өңірдегі ата-аналар мен оқушыларға еліміздегі мүмкіндіктерді көрсету. Биыл министрлік Атырауға қосымша тағы да 500 грант бөліп отыр. Сондай-ақ талапкерлер шетелдік университеттердің филиалда­рында мемлекеттік грант негі­зін­де оқи алады», деді Ғылым ­жә­не­­ жоғары білім министрінің кеңес­шісі Руслан Емелбаев.

Көрменің негізгі мақсаты – Қа­зақстан аумағынан шық­пай-ақ ше­телдік жоғары оқу орын­дарының білім беру бағ­дар­ла­маларына қол жеткізу мүм­кін­дігін кеңейту. Қазіргі таңда елі­міздің түрлі өңірлерінде әлем­нің озық университеттерімен бай­ланыс орнатылып, қос диплом негізінде білім алуға жол ашылған. Алдағы уақытта шетел­дік оқу орындарының филиал­дарын көбейту көзделіп отыр. Көрме аясында шетелдік университет филиалдарының артық­шылықтарын түсіндіре­тін ­ше­берлік сабақтары мен ма­ман­дық таңдауға бағыт бере­тін интер­активті кездесулер ұйым­дастырылды. Сонымен қатар түрлі викториналық ойындар өтіп, оқушылар белсенділік таныт­ты. Көрмеге келген Алмалы орта мектебінің оқушысы Ақ­­то­ты Бақтыбаева көп сұраққа жа­уап алғанын айтады. «2025 жы­лы Алмалы орта мектебін біті­ре­­мін. Көрмеде түрлі универ­ситет­тер­дің ерекшеліктерін, бас­қа оқу орындарынан қандай айырма­шылықтары бар екенін білдік. Сонымен қатар мемлекеттік білім гранты негізінде оқуға қойылатын талаптар туралы толық ақпарат алдық», деді.

«Study in Kazakhstan» көрмесі ал­дағы уақытта еліміздің басқа өңір­лерінде де жалғасады. Ұйым­дастырушылардың айтуынша, мұн­дай іс-шаралар жастардың білімге деген ынтасын арттырып, олардың дұрыс таңдау жасауына септігін тигізеді.