ҚҚС мөлшерлемесін арттыру есебінен мұнай кірістеріне тәуелділікті азайтуға, Ұлттық қордағы жинақтарды тұрақтандыруға және азаматтардың өмір сүру сапасын арттыратын басым жобаларды қаржыландыруға болады.
«ҚҚС-мен байланысты салық реформасы мәселесі ерекше назар аударуды талап етеді. Базалық мөлшерлеме – 16%. Неліктен? Себебі ҚҚС – республикалық бюджеттің ең үлкен кіріс көзі. Қосымша түсімдер шамамен 3 трлн теңге деп болжануда. Бұл жолдарға, мектептерге, ауруханаларға, инфрақұрылым мен қорғанысқа және дамуға арналған ақша», деді Мәжілістің жалпы отырысында жаңа Салық кодексінің жобасын бірінші оқылымда талқылау кезінде Премьер-министрдің орынбасары – ұлттық экономика министрі Серік Жұманғарин.
ҚҚС мөлшерлемесін 16%-ға дейін арттыру мұнайдан түсетін кірістерге тәуелділікті азайтуға, Ұлттық қордағы жинақтарды тұрақтандыруға, азаматтардың тұрмыс сапасын арттыратын басым жобаларды қаржыландыруға мүмкіндік береді. Дегенмен, бизнес дегеніміз – ол адамдар, компаниялар және тағдырлар екенін түсіне келе, сараланған мөлшерлемелер енгізілуде. Қазір шаруа қожалықтары ҚҚС төлемейді, ал заңды тұлғалар – ауыл шаруашылығы өндірушілері ҚҚС-ты 30% мөлшерінде төлейді. Бұл жаңа Салық кодексінде сақталады. Бұл ретте ҚҚС-тың тағы екі мөлшерлемесі көзделуде – медицина саласы үшін – 10% және экспорт пен жеңілдігі бар санаттар үшін – 0%.
