Дегдар композитордың мерейтойына арналған концертке Қазақстанның еңбек сіңірген қайраткерлері – Светлана Айтбаева, Азамат Жылтыркөзов, Жұбаныш Жексенұлы, Нұржан Жанпейісов, халықаралық және республикалық байқаулардың лауреаттары Феруза Рахметова, Артур Ғабдиев, Расул Жармағамбет, Нұрғалым Аманбай, Фархад Көбеев, Назерке Өмірбаева қатысып, өнер көрсетті. Сонымен бірге композитордың жиен немересі – Даяна Тілендиева, Қазыбек Құрайыш, Н.Тілендиев атындағы мемлекеттік академиялық, фольклорлы-этнографиялық «Отырар сазы» оркестрі, Е.Рахмадиев атындағы мемлекеттік академиялық филармонияның симфониялық оркестрі, Б.Байқадамов атындағы мемлекеттік хор капелласы қатысты.
– Әкем 70-ке толғанда мерейтойы 1995 жылы Опера және балет театрында өткен. Ол кезде мен 10 жаста болатынмын. Дүркіретіп тойын өткізіп едік, биыл да мерейтойлық кешке көптен дайындалып келдік. Бүгінгі концерт өте ерекше болды. Керемет әншілер әкемнің әйгілі әндерін нақышына келтіріп орындап шықты. «Құстар әні», «Өз елім» әндері бүкіл халыққа тараған, тіпті халық әндері болып кеткені елге мәлім, – деді Н.Тілендиев атындағы академиялық фольклорлы-этнографиялық «Отырар сазы» оркестрінің көркемдік жетекшісі Дінзухра Тілендиева.
Күйші-композитордың өзі негізін салып кеткен «Отырар сазы» оркестрі Н.Тілендиевтің 20-ға жуық күйлері мен әндерін орындады. Оның бас дирижері және көркемдік жетекшісі – Қазақстанның еңбек сіңірген қайраткері Дінзухра Нұрғисақызы. Сонымен қатар екінші дирижер ретінде Қазақстанның еңбек сіңірген әртісі, «Құрмет» орденінің иегері, профессор Жалғасбек Бегіндіков өнер көрсетті. Оркестр концертті композитордың «Ата толғауы» күйімен бастап, одан әрі саз иесі ұлтымыздың белгілі ақындарының өлеңіне жазған «Жан сәулем», «Абай табиғаты», «Есіңе мені алғайсың», «Өз елім», «Қарлығаштар», «Куә бол», «Дариға, домбырамды берші маған!», «Әкеме», «Әжеме», «Жүрегім менің», «Ақ құсым», «Алатау» әндерін орындады.
Ән-күй өнерінің данышпаны қазақ халқының музыка мәдениетін әлемдік деңгейге көтергені даусыз. Бүгінде композитордың мерейтойы ЮНЕСКО-ның шешімімен халықаралық мерекелік іс-шаралар тізіміне еніп, әлемдік ауқымда аталып өтіледі.
«Әлқисса – Нұрғиса» – ғасырлық мерейтойлардың ресми бастамасы, беташары іспетті. Тұтас ғұмырын өнер жолына арнаған дауылпаз Нұрғиса 500-ден астам музыкалық еңбекті ұлтына мұра етсе, оның ішінде әндер мен күйлерден бөлек, балет, пьеса, опера, фильмдерге жазылған музыкалар мен увертюралар, элегиялар мен поэмалар, контаталары бар. Дара талант сонымен бірге еліміздің Алтын қорына енген 20-дан астам кинотуындыға музыка жазған.
Концерт барысында күйшінің «Махамбет», «Әлқисса», «Ұлы той», «Аққу» сынды елге танымал күйлері де орындалды. Кеш соңы көпшіліктің бірге шырқауымен «Құстар қайтып барады» әнімен қорытындыланды. Мәдениет және ақпарат министрлігінің қолдауымен өткен концертте сахнаға Президент атынан ықылас гүлі әкелінді.
