Суреттерді түсірген – Жангелді ӘБДІҒАЛЫМ
Форумда «Қазақстан халқы Ассамблеясына 30 жыл» ескерткіш тақтасы салтанатты түрде ашылды. ҚХА-ның өңірдегі төрағасы, аймақ басшысы Ермағанбет Бөлекпаев Мемлекет басшысы Қасым-Жомарт Тоқаевтың құттықтау хатын оқып, форумға қатысушы қауымды мерейлі мерекемен құттықтады.
– Біз алғашқылардың бірі болып Қазақстан халқы Ассамблеясының 30 жылдығын мерекелеуді бастадық. Ассамблея құрылған жылдарында біздің қоғамымыздың маңызды буынына айналды. Бұл өзара құрметке, ынтымақтастыққа және қолдауға толы жол болды. Жақында ғана өткен «Ақсақалдар кеңесі» республикалық форумының қоғамдық және азаматтық сектор тарапынан жоғары бағаланды. Тұғырлы татулығымыз бен ырысты ынтымағымызды жаңа белеске жетелейтін, бірлігімізді бекемдейтін мұндай маңызы бар іс-шараларды жиі өткізуіміз қажет, – деді Е.Бөлекпаев.
Бұған қоса өңір басшысы облыстағы этномәдени бірлестіктердің Қазақстан халқы Ассамблеясының 30 жылдығына арнайы ұйымдастырған «Бірлікпен гүлденген Сарыарқа» көрмесін барлық қала, ауданды аралап, көшпелі етіп ұйымдастыруды тапсырды.
Алқалы жиында ассамблея мүшелері «Қайырымдылық керуені» атты акциясының бастау алғанын мәлімдеді. Игілікті шаруа бірден қолдау тапты. Облыстағы түгелге жуық этномәдени бірлестік өкілдері мұны жылы қабылдады. Мәселен, Балқаш қаласының Аналар кеңесінің төрағасы Альмира Мусина «Қайырымдылық керуені» акциясы аясында кеңес өкілдерімен қаладағы перзентхана барып, Алғыс айту күні туған балаларды құттықтап, сыйлық табыстап шыққандарын айтты. Қарағанды облысының корей этномәдени бірлестігінің төрайымы Лилия Ким де Қарағанды құрылыс-техникалық колледжінің 4-курс студенті Мұхаметәлі Исайынға әлем чемпионатында бақ сынау үшін демеушілік көмек көрсетілгенін жеткізді. «Өмір тынысы» қоғамдық бірлестігі трансплантацияланған науқастардың төрағасы Жәнібек Успанов донорларға адам өмірін сақтауға қосқан баға жетпес үлестері үшін алғыс білдірді. «Вайнах» шешен-ингуш этномәдени бірлестігінің төрағасы Увайс Джанаев этномәдени бірлестіктер басшыларының атынан қонақжай құрметі үшін қазақ халқына алғыс айтты.
Сонымен қатар форумда облыстық ҚХА белсенділері облыс әкімінің Алғыс хаттарымен марапатталды. «Намус» Әзербайжан ұлттық-мәдени орталығының төрағасы Гюлага Векилоглы Рзаев – марапатталғандардың бірі. Ол әзербайжан халқының қиын қыстау кезеңі – кеңес тұсындағы депортацияны есіне салып, бауырмал қазақ жұртына ризашылық білдірді.
Достықты ту еткен жиын этномәдени бірлестік өкілдері мен форумға қатысушылардың Тәуелсіздік стелласына гүл шоқтарын қою рәсімімен жалғасты.
Қарағанды облысы
