Білім мен спорт – екі бөлек әлем болып көрінгенімен, Айгүл Ержанова бұл екі саланы шебер үйлестіріп келеді. Сөзіміз дәлелсіз емес. Отыз жылдан астам уақытын білім саласына арнаған педагог былтыр мемлекет басшысының қолынан «Қазақстанның еңбек сіңірген ұстазы» медалін алды. Ал биыл 54 жастағы мұғалім кәсіби спортшылар қатысқан жарыста 100 кило зілтемірді көтеріп, рекордтық көрсеткіш орнатты.
«Осы жарысқа жиырмаға жуық мемлекеттен небір мықты спортшылар келген. Ал ел құрамасы бұл жарысқа алғаш рет қатысып отыр. Жеңіс тұғырынан көрінгеніме, әрине, қуаныштымын. Мен оқушыларыма адам мүмкіндігінің шексіз екенін көрсеткім келді. Білім мен спортты қатар алып жүруге әбден болады. Айтсам, сенбеуіңіз мүмкін. Өзім бұл спорт түріне 52 жасымда келдім. Көпшілік үшін бұл кеш басталған жол көрінуі мүмкін. Бірақ адам шын қаласа көздеген межесін бағындыра алады», дейді ол.
Иә, Айгүл Ержанова бар-жоғы бір жарым жыл ішінде ауыр атлетиканы меңгеріп, әлемдік ареналарда топ жарды. Осы уақыт аралығында, тіпті, бірнеше мәрте әлем чемпионы атанып үлгерді және ол мұнымен тоқтап қалмақ емес. Алдағы уақытта спортшы мұғалім Африкада өтетін халықаралық жарысқа қатыспақ.
«Әрбір жарыс – жаңа тәжірибе, әрбір рекорд – өз-өзіңді жеңу. Жеңіс – тек медаль алу емес. Ең бастысы – сену, әрекет ету және нәтиже үшін аянбай еңбектену. Бұл – тек спорттағы емес, өмірдегі де үлкен қағида», дейді чемпион мұғалім.
