Сурет: ҚР ІІМ Ұлттық ұланы «Оңтүстік» өңірлік қолбасшылығының баспасөз қызметі
Іс-шара жастарды отансүйгіштікке тәрбиелеуге, ардагерлерді құрметтеуге, Екінші дүниежүзілік соғысқа қатысушылардың батырлығын насихаттауға, сондай-ақ Отанды қорғаудың құндылығын және ұрпақтардың тарихи сабақтастығын терең түсінуге бағытталған.
Бауыржан Момышұлы атындағы 5571 әскери бөлімінің әскери қызметшілері бұл игі бастаманы 28 гвардиялық-панфиловшылар саябағындағы мәңгілік алауға гүл шоқтарын қоюдан бастады. Бөлімнің әскери оркестрі саябақтағы Даңқ мемориалы алдында соғыс жылдарындағы әндер мен музыкаларды орындады.
100 күн бойы өтетін маңызды шара аясында Екінші дүниежүзілік соғыс ардагерлері мен тыл еңбеккерлеріне қолдау және қайырымдылық көмек көрсету акциялары, әскери қызметшілер мен Ұлттық ұлан ардагерлерінің қатысуымен білім беру ұйымдарындағы ерлік сабақтары, әскери бөлімдерде «Ашық есік күндері», жастар арасында патриоттық челендждер ұйымдастырылады. Сондай-ақ ардагер үйінің алдында әскери оркестр соғыс жылдарындағы әндерді орындайды. Ұлттық ұланның әскери қызметшілері салтанатты шерумен өтіп, ардагерге әскери сәлем береді. Акция мамырда – Жеңістің 80 жылдығы мерекесі кезінде қорытындыланады.
