Сурет: sportplustv.kz
Дамир 1991 жылғы 3 ақпанда Ресейдің Орынбор облысы, Первомай ауданының Ударный ауылында дүниеге келген. Спорттық жолын футболдан бастап, 20 жастан асқанда ғана аралас жекпе-жекке ден қойды. «Алмас кездік қап түбінде жатпайды» демекші, көп ұзамай атағы алысқа жайылды. Әу баста ірілі-ұсақты турнирлерде топ жарды. 2017 жылы Ресейдегі «М-1» ұйымының чемпионы атанды. Финалдық бәсекеде Нева жағалауынан келген Максим Дивничті ұтты. Одан кейін өз атағын үш мәрте сәтті қорғады. Бразилиялық Рожериу Матиас да Консейсан, Раул Тутараули, Артем Дамковскиді жеңді. 2014–2018 жылдар аралығында 20 рет октагонға шығып, соның тек біреуінде ғана ұтылды. Қалған бәсекелерде оның басымдығы еш күмән туғызған жоқ.
2018 жылы Д.Исмағұлов UFC-мен келісімшартқа отырды. Әлемдегі ең белді промоушенде төрт жылдай өнер көрсетіп, жеті жекпе-жек өткізді. Бес рет ұтып, екі рет ұтылды. Алекс Горджис, Хоэль Альварес, Тиагу Мойзес, Рафаэл Алвис, Гурам Кутателадзені қапы қалдырғанымен, Арман Царукян мен Гранд Доусонды жеңе алмады. Содан соң алыстағы Америкадан елге оралды. Былтыр қазақ файтері екі рет айқас алаңына шықты. Алматыда Дмитрий Климовты ұтса, Ақтөбеде Обердан Виейра Тенорионы теуіп құлатты.
Данияр Қасқарауов жетекшілік ететін «Алаш Прайд» промоушені 2016 жылдың 15 желтоқсанында Алатау баурайында дүбірлі дода ұйымдастырды. Сол кезде Ресейде туып-өскен қандасымыздың өнерін алғаш рет тамашаладық. Ел Тәуелсіздігінің 25 жылдығына арналған жарыста Темірлан Айсәділов, Айбек Нұрсейіт, Мұрат Бақтыоразов сынды жергілікті жампоздарды сан соқтырды. Сөйтіп бас жүлдеге тігілген «темір тұлпарды» тізгіндеді.
