Сәбидің жетілуіне мүмкіндік беретін медициналық жабдықтар Маңғыстау облыстық әкімдігінің және «DUNGA OPERATING GMBH» компаниясының қолдауымен алынды. Құрылғыны табыстау рәсіміне аймақ басшысының орынбасары А.Өрісбаев, Маңғыстау облыстық денсаулық сақтау басқармасының басшысы Б.Ізбасаров, демеуші компанияның бас директоры Н.Әбдірахманов, көпбейінді аурухананың директоры Р.Бекібаев қатысты.
Перинаталдық орталықтың жансақтау бөлімінің меңгерушісі, неонатолог-дәрігер У.Рашидовтің айтуынша, гипотермия аппараты ауыр асфиксиямен туған сәбидің өмірін құтқарып, бас-ми ісігінің алдын алуға қажет. Аппарат жаңа туған нәрестенің дене қызуын автоматты түрде 34 градусқа дейін төмендетеді, 72 сағат бойы оны қажетті деңгейде ұстайды, содан кейін баланы біртіндеп жылытады. Бала ағзасындағы метаболизмді өзгертуге, миды глюкозамен қамтамасыз ете отырып, орталық жүйке жүйесінің жасушаларын қайтымсыз зақымданулардан қорғауға мүмкіндік береді.
Сондай-ақ шала туған нәрестеге арнап сатып алынған 8 инкубаторда нәрестелер салмақ қосқанға дейін жатады. Құралдардың ылғалдылығы, температурасы сақталып, автоматты түрде балаға қажетті жағдай жасайды, қосымша фотолампасы мен мониторы бар.
Өкпені жасанды желдету заманауи аппараты да аурухана игілігіне берілді. Құрылғы үш режімде көмек көрсетуге қауқарлы. Умид Рашидовтің айтуынша, алғашқы режім CPAP – шала туған балаларға демалуға көмектессе, SIMV баланың орнына тыныс алады. Ал жоғары жиіліктегі жасанды желдету өкпесі дамымаған, өкпесінде ақауы бар нәрестелердің жағдайын жақсартуға қолданылады.
Перинаталдық орталықта 6 балаға арналған жансақтау бөлімі былтыр ақпан айында ашылған болатын. Қазірде жансақтау бөлімінде 8 нәресте ем алып, оның екеуі оттегі қабылдап жатыр. 1 нәресте CPAP аппаратына, 1 нәресте ӨЖЖ құрылғысына қосылған. Қалған балалар ауыр жағдайдан шығып, өздігімен демалып, емделіп жатыр.
Маңғыстау облысы
