Сурет: el.kz
Соның ішінде өзім ұзақ жыл қызмет еткен білім саласына қатысты кейбір деректерді айта кетейін. Ел Президенті бюджеттік қаржының басым бөлігі мектептер, емханалар мен маңызды инфрақұрылым нысандарын салуға, өзге де әлеуметтік міндеттерді орындауға жұмсалатынын жеткізді.
«Әлеуметтік инфрақұрылымды дамыту мәселесіне де баса назар аударылады. Ауылдағы денсаулық сақтау жүйесін жаңғыртуға арналған ұлттық жобаның аясында ауылдық жерлерде медицина нысандарын салу жұмыстары жалғасады. Елімізде 460 мың оқушыға арналған 217 жайлы мектеп салу жоспарланған. Оның 105-інің құрылысы аяқталды. Мақсатымыз – апатты жағдайдағы және үш ауысыммен оқытатын мектептер мәселесін, сондай-ақ мектептегі орын тапшылығына қатысты түйткілдерді толығымен шешу. Бір ай бұрын 2025–2027 жылдарға арналған Республикалық бюджет қабылданды. Құжатта әлеуметтік бағыт басты басымдық ретінде сақталды. Онда денсаулық сақтау, білім беру саласына және әлеуметтік қажеттіліктерге өте қомақты қаржы қарастырылған», деді Президент.
Жыл сайын бюджетті жоспарлау, бюджеттің іске асырылуы жөнінде министрліктер жеке-жеке келіп есеп бергенде, біз Ата заңымызда атап айтылғандай, «Әлеуметтік мемлекет» екенімізге көзіміз анық жетеді. Бұл ретте 2024–2025 жылы білім беру саласында нағыз серпіліс болғанын, 460 мың оқушыға есептелген 217 жаңа жайлы мектептің құрылысы жоспарланғанын атап өту керек. Осы ауқымды жобаны іске асыру үш ауысымда оқыту, тозығы жеткен мектептер мәселесін түбегейлі шешуге, сондай-ақ оқушылар орны тапшылығын жоюға мүмкіндік береді. Білім беру инфрақұрылымын дамытуда қалаға да, ауылға да бірдей көңіл бөлініп, сапалы орта білім алуға қолжетімділікті қамтамасыз етеді. Қазіргі уақытта 254 мың орынға арналған 105 жайлы мектептің құрылысы аяқталды, оның 36-сы ауылды жерлерде орналасқан.
Жалпы, Мемлекет басшысының жыл басында дәл осылай түйткілді мәселелерді қамтып сұхбат беруі жақсы үрдіске айналып, тиімділігін дәлелдеп отыр. Кең көлемді әңгіме барысында ішкі саясаттың алдағы жылға жоспарланған негізгі жұмыстары айқындалған. Биліктің елімізді одан әрі дамытуға қатысты ұстанып отырған нақты бағыт-бағдары көрсетілген. Атқарушы мемлекеттік органдар мен қоғам бірлесе жұмыс істесе, көзделген жоспарлар тиімді нәтиже береді деп санаймыз.
Нұргүл ТАУ,
Мәжіліс депутаты
