«Жаңа нысан жергілікті инфрақұрылымның дамуы мен өңір тұрғындарының спортпен айналысуына соны серпін береді. Мемлекет басшысының халықтың саламатты өмір салтын жақсарту бағытындағы тапсырмаларын орындауда Алматы облысы да белсенділік танытып келеді. Қалалық жерлерден бөлек, шалғай аймақтарда да спорттық нысандарды салып, ауыл балаларының тегін спорт секцияларына қатысуына жан-жақты мүмкіндік қарастырып жатырмыз», деген Алматы облысының дене шынықтыру және спорт басқармасының басшысы Ерболат Сарабеков тұрғындарды мерейлі мерекемен құттықтады.
Спорттық нысанның салтанатты ашылуына Париж Олимпиадасының грек-рим күресінен күміс жүлдегері Демеу Жадыраев қатысты.
«Соңғы уақытта спорттық кешендер мен алаңдар балалардың да, ересектердің де сүйікті орнына айналды. Халықаралық аренада үлкен жетістіктерге жетсін десек, балаларды жастайынан спортқа бейімдеу үздіксіз жүргізілуге тиіс. Райымбек ауданынан білікті спортшылар шыққан. Мәселен, Руслан Жұмабеков, Ардақ Назаров, Бейбіт Назаров, Жасұлан Қыдырбаев сынды шебер спортшылардың есімі ерекше аталады. Алдағы уақытта да дәл осындай спорт ғимаратында шыныққан жастар Олимпиада жеңімпаздары болатынына сенімім мол», – деді ол.
70 орындық құрылыстың жалпы құны 1 млн 336,6 мың теңгені құрайды. Спорт кешенінде бокс, күрес, жаттығу залдары, сондай-ақ командалық спорт түрлеріне арналған зал қарастырылған. Жалпы ауданы 2253,3 шаршы метр ғимаратта жас спортшылар мен жаттықтырушыларға барынша қолайлы жағдай жасалған. Мұнда ауыл балалары спорттың бірнеше түрінен жаттығады.
Бүгінде облыста 1891 спорт нысаны жұмыс істейді. 2025 жылы қолға алынуы тиіс 15 спорт нысанының жобалық-сметалық құжаттамасы әзірленіп жатыр.
Алматы облысы
